Блогер «Шэры Кот» не выйшаў на волю пасля арышту. Яму прысудзілі яшчэ 15 сутак
Блогер Дзмітрый Казлоў, вядомы як «Шэры Кот», адбыў ужо 15 сутак у аршанскім ІЧУ, але 9 студзеня на волю так і не выйшаў, паведамляе «Віцебская Вясна».
Паводле інфармацыі, якую атрымалі актывісты «Еўрапейскай Беларусі», за блогерам лічыцца яшчэ адна пастанова аб арышце.
Аршанскі блогер Дзмітрый Казлоў быў затрыманы 26 снежня і асуджаны за ўдзел у акцыях за незалежнасць Беларусі. 10 студзеня над ім мусіць адбыцца яшчэ адзін суд у Мінску. Але 9 студзеня, па сканчэнні 15 сутак арышту, «Шэрага Ката» не вызвалілі.
Як паведамляюць актывісты кампаніі «Еўрапейская Беларусь», вызвалення блогера ў чацвер 9 студзеня чакалі каля аршанскіх ІЧУ і РАУС 25 ягоных паплечнікаў, але «Шэрага Ката» не выпусцілі.
«Супрацоўнікі міліцыі адмовіліся даваць інфармацыю, дзе адбывае арышт Дзмітрый, з якой прычыны адбывае і калі выйдзе на свабоду. У той жа час па тэлефоне адказвалі, што Дзмітрыя Казлова ў іх няма і ягонае месцазнаходжанне ім невядомае», — паведаміла «Еўрапейская Беларусь».
Толькі позна ўвечары (21.40) адзін з супрацоўнікаў аршанскага ІЧУ паведаміў актывістам, што ў Казлова маецца яшчэ адна пастанова аб арышце.
Праваабаронцы спрабуюць высветліць, калі і па якой справе Казлоў быў асуджаны на яшчэ адны "суткі".
Ранкам 10 студзеня праваабаронцам стала вядома, што Дзмітрый Казлову прысудзілі яшчэ адзін 15-суткавы арышт, і на волю блогер выйдзе толькі 24 студзеня.