Беларусь — на другім месцы па алкагалізме ў Еўропе

Згодна з новым даследаваннем, якое правяла каманда прыватнай рэабілітацыйнай клінікі Delamere, Беларусь займае другое месца па ўзроўні алкагалізму ў Еўропе.

Каманда даследчыкаў выкарыстала даныя Сусветнага дэмаграфічнага агляду. Яны прааналізавалі лічбы, каб выявіць, у якой еўрапейскай краіне самы высокі працэнт людзей, што пакутуюць на алкагольную залежнасць.

Другое месца ў гэтым спісе заняла Беларусь, дзе 18,80% насельніцтва пакутуе на алкагольную залежнасць. У Беларусі таксама быў адзін з самых высокіх паказчыкаў смяротнасці, звязанай з алкаголем, — 19,82 смяротных выпадку на 100 000 чалавек.

Найгоршым месцам у Еўропе па ўзроўні алкагалізму была прызнана Венгрыя, дзе амаль чвэрць насельніцтва (21,20%), як высветлілася, мае алкагольную залежнасць.

У 2014 годзе было выяўлена, што ўзровень спажывання алкаголю ў Венгрыі ў два разы вышэйшы, чым у любой іншай еўрапейскай краіне, у той час як венгерскае даследаванне 2020 года паказала, што большая частка праблемы алкагалізму звязана з людзьмі сталага веку, а не з маладымі.

Замыкае тройку лідараў Латвія, дзе 15,50% пакутуюць на алкагалізм.

Топ-10 еўрапейскіх краін з самым высокім узроўнем алкагалізму

• Венгрыя — 21.20%
• Беларусь — 18,80%
• Латвія — 15.50%
• Польшча — 12.80%
• Аўстрыя — 12.00%
• Літва — 11.00%
• Швецыя — 11,00%
• Швейцарыя — 9,50%
• Фінляндыя — 9.10%
• Вялікабрытанія — 8,70%