«Альтэрнатыва» просіць сталічныя ўлады добраўпарадкаваць Тучынскі сквер
Грамадскае аб’яднанне «Альтэрнатыва» (зарэгістраванае ў Латвіі) рыхтуе калектыўны зварот у Мінгарвыканкам з просьбай правесці рамонт і добраўпарадкаванне Тучынскага сквера.
Сквер, размешчаны ў межах вуліц Харкаўскай - Берута - Верашчагіна, за апошнія дзесяцігоддзі ператварыўся ў закінутую мясцовасць. Размешчаныя на яе тэрыторыі разнастайныя архітэктурныя дзіцячыя фігуры і атракцыёны, пешаходныя дарожкі — у аварыйным стане, разбураны фантан, а сам вадаём мае патрэбу ў комплекснай ачыстцы. Таксама ў парку не засталося лавак, смеццевых бакаў, функцыянуе толькі некалькі асвятляльных ліхтароў.
Побач са скверам знаходзіцца закансерваваны аб’ект - былы кінатэатр «Сучаснік», які перабудоўваюць ў культурна-забаўляльны цэнтр, заказчык — ЗУП «Мінск Прынцэс Гатэль», які таксама з’яўляецца адказным за тэрыторыю сквера. Аднак, будаўнічыя працы тут спыніліся ў мінулым годзе - узвядзенне аб’екта прыпынена і ўсе надзеі мясцовых жыхароў на пераўтварэнне парку зніклі.
«Такія абставіны ператвараюць сквер у нейкую зону адчужэння, упадабанае месца сустрэч асацыяльных элементаў грамадства. Відавочна, падобная карціна псуе імідж чыстага горада. Чамусьці мясцовыя ўлады спрабуюць не заўважаць такую праблему, абмяжоўваючыся абяцаннямі вось-вось разабрацца, навесці хоць бы экалагічны парадак, прыцягнуць да працы заказчыка будаўніцтва культурна-забаўляльнага цэнтра. Але, час усё ідзе, і гэта вось-вось не надыходзіць. Таму наша арганізацыя вырашыла ў бліжэйшы перыяд праявіць актыўнасць з мэтай паспрабаваць падштурхнуць гарадскія ўлады да вырашэння гэтай праблемы», — каментуе ідэю акцыі лідар «Альтэрнатывы» Алег Корбан.
Актывісты арганізацыі плануюць цягам ліпеня-жніўня 2016 г. сабраць у падтрымку дадзенага звароту подпісы мясцовых жыхароў, а таксама наведаць чыноўнікаў і кіраўніцтва камунальных службаў, каб дадаткова акцэнтаваць іх увагу на важнасці добраўпарадкавання сквера. Акрамя гэтага, будзе створана электронная петыцыя на рэсурсе http://zvarot.by, дзе кожны мінчанін таксама можа падтрымаць ідэю сваім подпісам.
Паводле інфармацыі з прэс-рэліза