Камбайны «Гомсельмаша» больш не паедуць ва Украіну

Украіна ўвяла санкцыі супраць 200 прадпрыемстваў Беларусі і Расіі. Адпаведны ўказ падпісаў сёння Уладзімір Зяленскі. Прэзідэнт Украіны паведаміў, што новыя санкцыі працягваюць курс на ізаляцыю і блакіраванне расійскай вайсковай прамысловасці.

«Сотні фізічных і юрыдычных асоб дзяржавы-тэрарыста і звязаных з Расіяй становяцца мішэнню глабальнай ізаляцыі. Вельмі актыўна працуем з партнёрамі, каб усе, хто фактычна спараджае гэтую агрэсію, хто дае зброю, боепрыпасы, тэхніку і тэхналогіі ў рукі тэрарыстаў, каб усе яны былі раздушаны светам», — заявіў Зяленскі.

У санкцыйны спіс трапілі 17 беларускіх прадпрыемстваў:

• ААТ «Гомельскі радыёзавод»,
• ААТ «Пеленг»,
• Навукова-вытворчае ўнітарнае прадпрыемства «Навукова-тэхнічны цэнтр «ЛЭМТ» БелОМА»,
• ААТ «Магілёўскі металургічны завод»,
• ААТ «Беларускі металургічны завод-кіруючая кампанія холдынга «Беларуская металургічная кампанія»,
• ААТ «Мінскі падшыпнікавы завод»,
• ААТ «БелАЗ» — кіруючая кампанія холдынга «БелАЗ-ХОЛДЫНГ»,
• ААТ «БелАЗ-СЭРВІС»,
• ААТ «Старадарожскі механічны завод»,
• ААТ «Кузлітмаш»,
• ААТ «Кранавы завод»,
• СЗАТ «Магілёўскі вагонабудаўнічы завод»,
• ААТ «Гомсельмаш»,
• ААТ «Гомельскі завод ліцця і нармаляў»,
• ТАА «ВК Лакаматыў-сэрвіс»,
• ААТ «Канструктарскае бюро «Дысплей»,
• Пярвічная прафсаюзная арганізацыя дзяржаўнай навуковай установы «Інстытут парашковай металургіі імя акадэміка А. У. Романа».