Урад Францыі сыдзе ў тэхнічную адстаўку на працягу дня
Урад Эдуара Філіпа ў Францыі на працягу панядзелка сыдзе ў тэхнічную адстаўку па выніках парламенцкіх выбараў, якія адбыліся ў нядзелю. Новы склад Кабінета міністраў будзе вызначаны на працягу тыдня.
Партыя прэзідэнта Францыі Эмануэля Макрона "Наперад!" была створана ўсяго год таму. Фота EPA
Такія тэрміны назваў 19 чэрвеня ў эфіры радыёстанцыі RTL дзяржсакратар па сувязях з парламентам, афіцыйны прадстаўнік урада рэспублікі Крыстоф Кастанер.
"Прэм'ер-міністр у бліжэйшыя гадзіны будзе вымушаны падаць просьбу пра адстаўку, як таго патрабуе звычай. Думаю, гэта адбудзецца на працягу дня", — сказаў ён.
Новы склад кабінета міністраў, дадаў Кастанер, будзе вызначаны на працягу тыдня. "У бліжэйшыя дні будзе сфармаваны новы ўрад пад кіраўніцтвам, я думаю, Эдуара Філіпа", — адзначыў дзяржсакратар.
Адстаўка ўрада пасля парламенцкіх выбараў — негалосная палітычная традыцыя ў Францыі, не прапісаная ў заканадаўстве. Улічваючы пераканаўчую перамогу прэзідэнцкай большасці, чакаецца, што цяперашні Кабмін будзе зноўку сфармаваны ў бліжэйшыя дні з мінімальнымі перастаноўкамі.
Яўка ў другім туры апынулася значна ніжэй, чым была на выбарах у 2012 годзе. Многія выбаршчыкі — як апаненты, так і прыхільнікі Макрона, — як лічыцца, не прыйшлі на выбарчыя ўчасткі пасля рашучай перамогі яго партыі ў першым туры. Прэм'ер-міністр Эдуар Філіп, хоць і адзначыў нізкую яўку, сказаў, што яго партыя будзе абараняць інтарэсы ўсіх французаў., паведамляе ВВС.
Другі тур выбараў у Нацыянальны сход — ніжнюю палату парламента Францыі — адбыўся ў нядзелю. Перамогу атрымаў прапрэзідэнцкі рух "Наперад!", які выступае адзіным блокам з цэнтрыстамі з "Дэмакратычнага руху". Агулам яны атрымалі 350 з 577 месцаў і ўтвараюць абсалютную парламенцкую большасць, на аснове якой будзе сфармавана ўрад.
Найбуйнейшай апазіцыйнай фракцыяй сталі правацэнтрысты — "Рэспубліканцы", Саюз дэмакратаў і незалежных і іншыя правыя партыі, што знаходзяцца з імі ў альянсе. Усе разам яны атрымалі 137 дэпутацкіх мандатаў. Вельмі правы "Нацыянальны фронт" заваяваў толькі восем крэслаў і не можа фармаваць уласную фракцыю — для гэтага неабходна не менш за 15 дэпутатаў.
Левыя партыі, якія ў папярэднім скліканні мелі большасць у Нацсходзе, гэтым разам пацярпелі паразу. Былая кіруючая Сацыялістычная партыя ў саюзе з Левай радыкальнай партыяй і "Зялёнымі" атрымала толькі 44 месцы, леварадыкалы з руху "Няскораная Францыя" разам з камуністамі фармуюць асобную фракцыю, заваяваўшы 27 мандатаў.