У Іране новы закон — цяпер за «прапаганду» парушэння ісламскага дрэс-коду — да 10 гадоў турмы
Парламент Ірана ўхваліў закон «Аб хіджабе і цнатлівасці», які робіць больш жорсткім пакаранне для жанчын, якія парушаюць патрабаванні ісламскага дрэс-коду.
За закон прагаласавалі 152 чальцы парламента, супраць выступілі 34 дэпутаты, устрымаліся 7 чалавек. Цяпер закон павінен ухваліць Савет Вартавых Канстытуцыі, а затым яго падпіша прэзідэнт, паведамляе іранскае апазіцыйнае выданне «IranWire».
Дакумент утрымлівае больш за 70 артыкулаў. Згодна з ім, жанчыны, якія не носяць хіджаб або «адпаведную вопратку», могуць быць аштрафаваны на суму ў эквіваленце 150 долараў ЗША. Калі штраф не аплаціць на працягу месяца, то ён падвоіцца.
За паўторнае парушэнне жанчынам пагражае ад шасці месяцаў да трох гадоў пазбаўлення волі. Цяпер за парушэнне дрэс-коду тэрмін пазбаўлення волі складае ад 10 дзён да двух месяцаў, піша «BBC News».
Сёння ў Іране, нягледзячы на ўсе карныя захады ўлад, усё большая колькасць жанчын і дзяўчат увогуле перасталі хаваць валасы ў грамадскіх месцах, нягледзячы на вяртанне паліцыі нораваў на вуліцы і ўстаноўку камер назірання.
Заходнія СМІ, у тым ліку «The Guardian», адзначаюць, што закон прадугледжвае ад пяці да 10 гадоў пазбаўлення волі для людзей, «якія прапагандуюць» парушэнне дрэс-коду «ў супрацоўніцтве з замежнымі або варожымі ўрадамі, СМІ, групамі або арганізацыямі».
Для людзей, «якія прапагандуюць галізну» або «высмейваюць хіджаб» у сацсетках, прадугледжаны штрафы.
Глядзіце таксама
Іранскае праўладнае агенцтва IRNA абвінаваціла заходніх журналістаў у хлусні, а іранцаў, якія пратэставалі супраць дрэс-коду, — у сувязях з замежнымі спецслужбамі. Пры гэтым інфармацыю аб тэрмінах і штрафах агенцтва не абвергла, а сам закон IRNA падтрымала«»«»«» і нават заявіла, што «кляйменне» жанчын, якія не выконваюць дрэс-код, «сапраўднымі злачынцамі» пойдзе на карысць грамадству, паколькі стыгматызацыя вымусіць іх імкнуцца да большай адаптацыі ў соцыуме.
«Al Jazeera» адзначае, што ва ўхваленым парламентам дакуменце таксама прадугледжаны штрафы і турэмныя тэрміны для супрацоўнікаў дзяржструктур і прыватных прадпрыемстваў, калі яны не будуць сачыць за выкананнем дрэс-коду.
«IranWire» лічыць, што гэтая частка законапраекта можа прымусіць працадаўцаў пачаць звальняць сваіх супрацоўніц.
Іранскае выданне нагадвае, што ўлады закрылі сотні прадпрыемстваў з-за невыканання ўласнікамі або кіраўнікамі правілаў нашэння хіджаба, а таксістаў штрафавалі за перавозку жанчын без хустак.
Цяпер паліцыя і ахоўнікі выдаюць папярэджанні ў метро, аэрапортах і іншых грамадскіх месцах.
У ААН закон «Аб хіджабе і цнатлівасці» назвалі «формай гендарнага апартэіду», падкрэсліўшы, што ён парушае фундаментальныя правы жанчын, у тым ліку права на ўдзел у культурным жыцці, права на свабоду меркаванняў і іх выказвання, права на мірны пратэст і на свабоду перамяшчэння, а таксама права на доступ да сацыяльных, адукацыйных і медыцынскіх паслуг.
Глядзіце таксама
У 2022 годзе ў Іране некалькі месяцаў працягваліся масавыя пратэсты, падставай для якіх стала смерць 22-гадовай Махсы Аміні — яна памерла неўзабаве пасля таго, як яе затрымала паліцыя нораваў за «няправільнае» нашэнне хіджаба.
Пратэстоўцы патрабавалі гендарнай роўнасці, а неўзабаве выступілі за маштабныя рэформы і змену рэжыму ў краіне.
Жанчыны спальвалі свае хусткі або размахвалі імі ў паветры на агульнанацыянальных дэманстрацыях супраць духавенства, падчас якіх, як паведамляецца, сотні людзей былі забітыя падчас разгону сілавікамі.
Пратэсты былі жорстка падаўлены. Дзясяткі тысяч чалавек затрымалі, каля 550 чалавек, паводле даных праваабаронцаў, загінулі ў сутыкненнях з паліцыяй. Сем чалавек былі пакараны, яшчэ дзесяці вынеслі смяротныя прысуды, не прыведзеныя ў выкананне.
Глядзіце таксама
Паводле www.bbc.com, meduza.io, iranwire.com