РФ і КНДР: ядзерная зброя ў абмен на салдат?

Паўднёвая Карэя асцерагаецца, што КНДР у абмен на адпраўку сваіх салдат у Расію можа запатрабаваць ядзерныя тэхналогіі. КНДР 31 кастрычніка ўдала запусціла міжкантынентальную балістычную ракету, гэты запуск стаў самым працяглым у гісторыі паўночнакарэйскіх выпрабаванняў. Ракета знаходзілася ў паветры 86 хвілін і пераадолела 1 тысячу кіламетраў.

У абмен на адпраўку сваіх вайскоўцаў у Расію Паўночная Карэя з «высокай імавернасцю» можа запытаць тэхналогіі — напрыклад, «у галіне ядзернага і балістычнага ракетнага патэнцыялу», заявіў міністр абароны Паўднёвай Карэі Кім Ён Хен на прэс-канферэнцыі з кіраўніком Пентагона Лойдам Осцінам, піша meduza.io.

Па словах паўднёвакарэйскага міністра, разгортванне паўночнакарэйскіх войскаў не абавязкова прывядзе да вайны на Карэйскім паўвостраве, але можа павялічыць пагрозы бяспекі ў адносінах паміж дзвюма краінамі.

На закрытым брыфінгу высокапастаўлены паўднёвакарэйскі чыноўнік заявіў, што Сеул ацэньвае колькасць паўночнакарэйскіх войскаў, адпраўленых у Расію, у 11 тысяч чалавек. Каля трох тысяч з іх, як сцвярджаецца, ужо знаходзяцца ў заходняй частцы краіны і праходзяць навучанне.

Кіраўнік Пентагона Осцін на адкрытым брыфінгу заявіў: «Ёсць падставы меркаваць», што КНДР адправіла каля 10 тысяч жаўнераў для праходжання падрыхтоўкі на ўсходзе Расіі, і некаторыя «ўжо наблізіліся да Украіны». 

«Мы бачым, што яны апранутыя ў расійскую форму і забяспечаныя расійскай амуніцыяй», — сказаў Осцін.

Ён нагадаў, што Расія падпісала рэзалюцыю Рады Бяспекі ААН, якая абавязвае не даваць вайсковую дапамогу КНДР.

Таксама Осцін запэўніў свайго паўднёвакарэйскага калегу, што ЗША «па-ранейшаму адданыя абароне Рэспублікі Карэя». Гэтая прыхільнасць, паводле яго слоў, падмацаваная «ўсім спектрам звычайных супрацьракетных узбраенняў, ядзерных і перадавых няядзерных магчымасцяў ЗША».

Пентагон: Войскі КНДР стануць «дадатковымі целамі на полі бою»

• Нагадаем, у сярэдзіне кастрычніка выведка Паўднёвай Карэі пачала паведамляць аб адпраўцы паўночнакарэйскіх вайскоўцаў у Расію. Паводле ацэнак выведкі, гаворка ішла пра 12 тысяч жаўнераў. Да канца кастрычніка частку з іх (каля 1500 байцоў) ужо перакінулі для падрыхтоўкі на Далёкі Усход Расіі, сцвярджалі ў выведцы.
• 28 кастрычніка генеральны сакратар NATO Марк Рутэ пацвердзіў, што паўночнакарэйскія салдаты, перакінутыя ў Расію, былі накіраваныя ў Курскую вобласць на дапамогу расійскім вайскоўцам. 
• Прэзідэнт ЗША Джо Байдэн  назваў адпраўку паўночнакарэйскіх вайскоўцаў у Расію «небяспечнай падзеяй» на фоне здагадак Захаду аб тым, што яны будуць удзельнічаць у вайне ва Украіне на баку Расіі. 
• 30 кастрычніка Financial Times са спасылкай на ўкраінскую выведку паведаміла, што каля трох тысяч паўночнакарэйскіх вайскоўцаў прывезлі з Далёкага Усходу ў Курскую вобласць і размясцілі 28 кастрычніка ў казармах прыкладна за 50 кіламетраў ад мяжы з Украінай.
• Уладзімір Пуцін наўпрост удзел паўночнакарэйскіх салдат у вайне не пацвярджаў, аднак 24 кастрычніка на прэс-канферэнцыі пасля саміту БРІКС ён адказаў на пытанне аб спадарожнікавых здымках, якія паказваюць прысутнасць вайскоўцаў КНДР. «Здымкі — рэч сур'ёзная. Калі ёсць здымкі, значыць яны нешта адлюстроўваюць», — сказаў Пуцін.

Як КНДР за мяжой ваявала

КНДР запусціла міжкантынентальную балістычную ракету

Паўночная Карэя правяла чарговы запуск міжкантынентальнай балістычнай ракеты. Гэта выклікала занепакоенасць суседніх краін і ва ўсёй міжнароднай супольнасці.

Паводле інфармацыі паўднёвакарэйскага агенцтва «Ёнхап», запуск адбыўся раніцай 31 кастрычніка з раёна Пхеньяна ў бок Японскага мора. Ракета праляцела некалькі соцень кіламетраў і ўпала ў акваторыю мора, не дасягнуўшы тэрыторыі Японіі.

Цэнтральнае тэлеграфнае агенцтва Паўночнай Карэі (ЦТАК) заявіла, што КНДР правяла «вельмі важнае» выпрабаванне міжкантынентальнай балістычнай ракеты, а запуск «абнавіў рэкорд магутнасці стратэгічнай ракеты». 

«Гэты пуск — справядлівая і цалкам легітымная вайсковая мера, якая паказвае нашу рашучасць даць адказ ворагам, якія пагражалі бяспецы Рэспублікі і апошнім часам наўмысна пагаршалі сітуацыю ў сферы бяспекі ў рэгіёне», — заявіў Кім Чэн Ын.

Ракета знаходзілася ў паветры 86 хвілін, пераадолела 1 тыс. км, вышыня яе палёту ацэньваецца прыкладна ў 7 тыс.км. 

Міністр абароны Японіі Ген Накатані заявіў, што гэтыя параметры дасягнулі максімальных паказчыкаў за ўвесь час паўночнакарэйскіх выпрабаванняў.

Японская берагавая ахова таксама пацвердзіла факт запуску і падзенне ракеты ў некалькіх сотнях кіламетраў ад берага Японіі. Прэм'ер-міністр Японіі Фуміа Кісіда рэзка асудзіў дзеянні КНДР і назваў іх «пагрозай міру і бяспецы рэгіёна».

Варта адзначыць, што гэты запуск адбыўся неўзабаве пасля таго, як ЗША і Паўднёвая Карэя асудзілі КНДР за адпраўку сваіх вайскоўцаў у Расію. Папярэднія выпрабаванні міжкантынентальнай балістычнай ракеты КНДР праводзіла ў снежні мінулага года.

Міжнародныя эксперты адзначаюць, што такія дзеянні Паўночнай Карэі могуць прывесці да далейшага абвастрэння адносін з суседнімі краінамі і ЗША. Рада Бяспекі ААН неаднаразова прымала рэзалюцыі, якія забараняюць КНДР праводзіць ракетныя выпрабаванні, аднак Пхеньян працягвае ігнараваць гэтыя патрабаванні.

Міжнародная супольнасць заклікае КНДР адмовіцца ад правядзення далейшых ракетных і ядзерных выпрабаванняў і вярнуцца да перамоваў па дэнуклеарызацыі Карэйскага паўвострава. Аднак пакуль што Пхеньян не выказвае гатоўнасці да канструктыўнага дыялогу і працягвае развіваць сваю ракетна-ядзерную праграму.

Паводле meduza.io, zerkalo.io, euroradio.fm, www.dw.com