Расія вярнула амбасадара ў Вашынгтон

Амбасадар Расіі ў ЗША Анатоль Антонаў прыляцеў у нядзелю ў Злучаныя Штаты пасля прыкладна трох месяцаў знаходжання ў Маскве.

Самалёт з ім прызямліўся ў Нью-Ёркскім аэрапорце імя Джона Кенэдзі. Чакаецца, што адтуль амбасадар накіруецца ў Вашынгтон, піша REFORM.by са спасылкай на ТАСС.

Амбасадар Расіі ў ЗША Анатоль Антонаў быў адкліканы ў Маскву ў сакавіку пасля інтэрв’ю Джо Байдэна, у якім той сказаў, што лічыць Уладзіміра Пуціна забойцам. Пасол ЗША ў Расіі Джон Саліван адправіўся ў Вашынгтон на кансультацыі ў красавіку па рэкамендацыі расійскіх уладаў пасля таго, як ЗША ўвялі санкцыі супраць Расіі.

На нядаўняй сустрэчы ў Жэневе Байдэн і Пуцін дамовіліся аб вяртанні паслоў у Маскву і Вашынгтон.