Планы агрэсіі. Дасье ў карыкатурах і мапах

Замежжа 13.02.2022

Адной з асаблівасцяў цяперашняй расійска-ўкраінскай канфрантацыі стала з'яўленне ў медыя вялікай колькасці мапаў, на якіх, быццам, выяўлены план агрэсіі РФ.

Распачаў тэндэнцыю нямецкі таблоід Bild. На яго старонках яшчэ ў пачатку снежня 2021-га быў апублікаваны матэрыял, у якім сцвярджалася, што выданне нібыта даведалася дэталі планаў Масквы аб «уварванні» ва Украіну. Газета, спасылаючыся, у прыватнасці, на блізкія да НАТА крыніцы, размясціла карту, дзе пазначаныя кірункі «нападу». Вылучаны тры фазы, прычым апошняя мае на ўвазе наступ на Кіеў з тэрыторыі Беларусі.

Карта выклікала скепсіс не толькі таму, што Bild — жоўтае выданне. Стваральнікі карты наблыталі з назвамі, выкарыстоўваючы часцяком тапонімы часоў Другой сусветнай. Тым не менш ва ўкраінскіх СМІ карту абмяркоўвалі на самым высокім экспертным узроўні. А лідар нацыяналістаў Дзмітрый Яраш для ўзняцця духу суайчыннікаў перарабіў арыгінал, прапанаваўшы свой варыянт, на якім ВСУ ў тры этапы захопліваюць кавалак заходніх абласцей Расіі.

Прыкметная рэакцыя публікі на карту немцаў прымусіла іншыя выданні заняцца картаграфіяй. Напрыклад, расійскае выданне Antimaidan намалявала аж чатыры карты, як той казаў, на ўсе выпадкі жыцця. Усе яны зыходзяць з таго, што Расіі давядзецца адказваць на наступ украінскіх войскаў на Данбасе. У трох варыянтах: калі баі выйдуць за межы Данбаса, калі Украіна атакуе Крым і калі ВСУ прадоўжаць атакі з-за Дняпра, прадугледжваецца падключэнне беларускага саюзніка. Напрыклад, у выпадку варыянту нападу Украіны на Крым.

Пазней падобныя карты пачалі друкаваць і іншыя выданні, але паўтарыць поспех Bild атрымалася, мабыць, толькі Daily Mail. 2 лютага са спасылкай на крыніцы ў разведцы ЗША яна выклала свой план расійскага бліцкрыгу, які павінен быў стартаваць 13 лютага. На гэтым малюнку місія войскаў, што будуць наступаць з сінявокай, больш глабальная. Аж да атачэння Кіева і стварэння там «лялечнага рэжыму».

Як вядома, 12 лютага нічога не здарылася. Але калег з Daily Mail падстрахаваў амерыканскі тэлеканал NBC News. Ён анансаваў уварванне ва Украіну на 16 лютага і апублікаваў адпаведную карту. Больш за ўсё постсавецкіх чытачоў уразіла тое, што на Украіну, паводле мапы, збіраецца наступаць Адэса.
Падобныя ляпы ў прынцыпе характэрны шматлікім заходнім медыя, якія слаба ўяўляюць геаграфію рэгіёна. Дастаткова сказаць, што ў студзені адзін амерыканскі канал абазначыў Харкаў «расійскім горадам». Але гэта яшчэ кветачкі. Улетку 2021 той жа CNN пусціў у эфір карту Украіны, на якой Кіеў быў названы «Улан-Батарам».

Выглядае на тое, што бясконцы шквал картаграфічнага алармізму паступова выклікае ў аўдыторыі ўсё большую іранічную рэакцыю. У адказ карыстальнікі інтэрнэту актыўна малююць экстравагантныя карты свайго ўяўлення будучай кампаніі.