Панджшэр не скараецца. У адзінай непадкантрольнай талібам правінцыі Афганістана працягваецца супраціў

Афганскія сілы супраціву, як паведамляе тэлеканал Al Jazeera, замарудзілі наступ талібаў. Таксама паўстанцы Панджшэра абвясцілі аб цяжкіх стратах у праціўніка, піша «Эха Масквы».

Актыўныя ўзброеныя сутыкненні працягваюцца ў правінцыі Панджшэр, і талібы, якія захапілі ўладу, усё яшчэ не могуць падысці да яе сталіцы — Базараку. Як адзначае катарскі тэлеканал Al Jazeera, наступ прыпынены праз тое, што галоўныя дарогі ў сталіцу рэгіёна і ў рэзідэнцыю губернатара замінаваныя.

Аб баявых дзеяннях прыходзяць супярэчлівыя звесткі. Напярэдадні талібы абвясцілі аб захопе Панджшэра, пасля чаго прыхільнікі руху па краіне пачалі адзначаць гэтую падзею. У выніку святочнай стральбы ў паветра ў розных раёнах пацярпелі і загінулі семдзесят чалавек.

Аднак іх праціўнікі адмаўляюць інфармацыю аб паспяховым наступе і заклікаюць не верыць прапагандзе. Прадстаўнік Фронту нацыянальнага супраціву абвясціў, што панджшэрская цясніна застаецца недаступнай для талібаў. Па гэтых даных, больш за тысячу талібаў узятыя ў палон, а яшчэ каля шасцісот забітыя.

Панджшэр зараз застаецца апошняй непадкантрольнай «Талібану» афганскай правінцыяй. Супраціў там узначальвае 32-гадовы Ахмад Масуд-малодшы — сын і паслядоўнік легендарнага палявога камандзіра Ахмада Шаха Масуда, якія паспяхова ваяваў у Афганістане яшчэ з савецкімі войскамі.