Ізраіль. Сірэна ў памяць пра загінулых воінаў і ахвяраў тэрактаў

У Ізраілі прагучала 2-хвілінная сірэна ў памяць пра воінаў і ахвяр тэрактаў. Услед за гэтым па ўсёй краіне пачаліся жалобныя цырымоніі ў месцах пахаванняў і ля мемарыялаў. У мерапрыемствах прынялі ўдзел прэзідэнт і прэм'ер-міністр Ізраіля.

Дзвюххвілінная сірэна прагучала ў Ізраілі ў 11:00 па мясцовым часе і заклікала грамадзян ушанаваць памяць загінулых у войнах за габрэйскую дзяржаву і загінулых у выніку тэрактаў. На час сірэны ў краіне цалкам спыніўся транспарт, многія вадзіцелі і пасажыры выйшлі з машын, каб стоячы ўшанаваць памяць загінулых.

Пасля гэтага па ўсёй краіне пачаліся жалобныя цырымоніі ў месцах пахаванняў і ля мемарыялаў. Галоўныя мерапрыемствы праводзяцца на гары Герцля ў Ерусаліме з удзелам прэм'ер-міністра Біньяміна Нетаньяху, прэзідэнта Рэўвена Рыўліна і начальніка Генштаба Гадзі Айзенкота.

Цырымонія памінання загінулых у войнах праходзіць на вайсковых могілках у Тэль-Авіве з удзелам міністра абароны Авігдора Лібермана.

Пачатак Дню памяці паклаў у нядзелю ўвечары жалобны мітынг, які адбыўся перад заходам сонца на тэрыторыі іерусалімскага мемарыяла "Яд-Лебанім".

На гары Герцля ў Ерусаліме з удзелам кіраўніцтва краіны прайшла цырымонія адкрыцця новага мемарыяльнага комплексу ў памяць аб ізраільцянах, якія загінулі ў войнах, бітвах, тэрактах і спецыяльных аперацыях. Комплекс вышынёй 18 метраў складаецца з 23 тысяч каменных пліт з імёнамі загінулых.

Штогод у Дзень памяці ў Ізраілі публікуюцца дадзеныя пра ўсіх загінулых у войнах і канфліктах на гэтай зямлі, у тым ліку чальцоў падпольных арганізацый часоў брытанскага мандата, ахоўнікаў паселішчаў, салдат, паліцыянтаў і супрацоўнікаў спецслужбаў. Адлік вядзецца з 1860 года, калі габрэі, якія прыехалі з Еўропы, пачалі сяліцца па-за сценамі Старога горада ў Ерусаліме. На дадзены момант у спісе загінулых пры выкананні пазначаныя імёны 23,5 тысячы чалавек. Спіс грамадзянскіх асоб, якія сталі ахвярамі тэрору, вядзецца з моманту абвяшчэння незалежнасці Дзяржавы Ізраіль у 1948 годзе, ён уключае імёны 3,1 тысячы загінулых у тэрактах, сярод якіх 122 замежнікі і 100 ізраільцян, якія загінулі ў тэрактах па-за межамі Ізраіля.

Дзень памяці адзначаецца 4 дня месяца іяр па габрэйскім календары. Гэтай жалобе па загінулых папярэднічае галоўнае дзяржаўнае свята Ізраіля — Дзень незалежнасці. Жалобныя мерапрыемствы спрыяюць таму, каб усе жыхары краіны ўсвядомілі цану, заплачаную за здабыццё дзяржаўнасці.

Паводле ТАСС