Байдэн і Зяленскі запланавалі тэлефонную размову

Тэлефонная размова прэзідэнта ЗША Джо Байдэна са сваім украінскім калегам Уладзімірам Зяленскім запланавана на 2 студзеня, піша Свабода.

Лідары дзвюх краін плянуюць разгледзець падрыхтоўку да будучых дыпламатычных сустрэч, накіраваных на дээскалацыю напружанасці праз нарошчванне расійскіх войскаў каля Украіны.
Падчас размовы Байдэн мае намер «пацвердзіць падтрымку ЗША суверэнітэту і тэрытарыяльнай цэласнасці Украіны ва ўмовах расійскай агрэсіі», — сказаў прадстаўнік Белага дому.
Тэлефонная размова паміж двума лідарамі стане другой за тры тыдні, у той час, як Белы дом намагаецца супрацьдзейнічаць ваеннай пагрозе з боку Масквы, якая выклікала занепакоенасць NATO і Кіева адносна магчымага ўварвання Расіі ва Украіну найбліжэйшымі тыднямі.
Размова адбудзецца пасля перамоваў паміж Байдэнам і прэзідэнтам Расіі Уладзімірам Пуціным 30 снежня, падчас якіх прэзідэнт ЗША заявіў, што Злучаныя Штаты і іх саюзнікі ўвядуць жорсткія санкцыі супраць Расіі, калі яна ўварвецца ва Украіну.