Польшча падтрымала «замарозку» санкцый ЕС адносна Беларусі

Намеснік міністра замежных спраў Польшчы Конрад Шыманскі 10 лютага заявіў, што Варшава падтрымлівае абмежаванне еўразвязаўскіх санкцый супраць прадстаўнікоў Беларусі.



Па словах польскага дыпламата, якія перадае zn.ua, ЕС гатовы падкарэктаваць сваю цяперашнюю палітыку ў дачыненні да Беларусі ў бок большай адкрытасці, і Польшча падтрымлівае гэтую вялікую адкрытасць. «Гэта азначае, што цяперашняя палітыка санкцый у дачыненні да Мінска будзе скарочана да захавання эмбарга на гандаль зброяй і пакіданне ў санкцыйным спісе толькі чатырох чалавек, якія непасрэдна датычныя да знікнення апазіцыянераў у 1999-2000 гадах», — паведаміў Шыманскі.

Таксама ён дадаў, што лібералізацыя візавага рэжыму паміж ЕС і беларускімі чыноўнікамі будзе звязана з выкананнем правоў нацыянальных меншасцяў у Беларусі і асноў вяршэнства права і дэмакратыі.

Нагадаем, 28 кастрычніка Еўрасаюз прыпыніў на чатыры месяцы санкцыі супраць прадстаўнікоў Беларусі. Пад «замарозку» трапілі 171 фізічная і 10 юрыдычных асоб.

Да канца лютага Савет міністраў замежных спраў павінен прыняць рашэнне адносна далейшага лёсу санкцыяў. У «чорным спісе» пакуль што застаюцца чатыры чалавекі.