Кіраўнік МЗС ФРГ абяцае санкцыі супраць Мінска, пакуль яны не дадуць эфекту

Германія паабяцала ўводзіць санкцыі супраць рэжыму Лукашэнкі, пакуль яны не дадуць эфекту.

Пра гэта заявіў кіраўнік Міністэрства замежных спраў Германіі Хайка Маас на прэс-канферэнцыі, адказваючы на пытанне карэспандэнта DW пра крокі Берліна ў сувязі з затрыманнем магілёўскага журналіста Аляксандра Буракова, які супрацоўнічае з нямецкай медыякампаніяй.

«Нам вядомы гэтыя выпадкі, і ў мінулым прымалі меры на ўзроўні консульства, будзем гэта рабіць і ў будучыні, аднак не публічна, — падкрэсліў Маас. — Таму што на вопыце  ведаем, што часам занадта вялікая публічнасць падобных спраў не дазваляе дамагчыся жаданых вынікаў».

Маас нагадаў што Еўрасаюз увёў ўжо цэлы шэраг пакетаў санкцый у дачыненні да ўлад Беларусі. Кіраўнік дыпламатычнага ведамства Германіі ў той жа час са шкадаваннем прызнаў, што  санкцыі «відавочна, не дзейнічаюць», і тое, што адбываецца ў краіне, выклікае крайнюю трывогу:

«Вельмі складана звонку, пры дапамозе тых інструментаў, якія мы ўжывалі, прымусіць адмовіцца ад свайго шляху рэжым, які, на жаль, падобна, моцна сядзіць у сядле і абараняе сваю ўладу самым жорсткім чынам».

«У рамках Еўрапейскага саюза, мы, несумненна, яшчэ будзем абмяркоўваць, ці дастаткова цяперашняй санкцыйнай палітыкі або ёсць неабходнасць увядзення новых санкцый», — адзначыў Хайка Маас.
Паводле www.racyja.com/