Грыбаўскайце: «Літва не можа супрацоўнічаць з Беларуссю праз будаўніцтва Астравецкай АЭС».

Прэзідэнтка Літвы лічыць, што такім чынам Літва прызнае законнасць пабудовы атамнай электрастанцыі ля сваіх межаў. Пра гэта паведамляе Радыё Свабода. 

Паводле Далі Грыбаўскайце, супрацоўніцтва з Беларуссю ў той час, калі рыхтуецца да запуску Астравецкая АЭС, немагчымае. Паколькі такім чынам Літва прызнала б законнасць гэтай электрастанцыі і страціла б магчымасць патрабаваць яе закрыцця.
«Любая згода на ўдзел і стварэньне сумесных інстытутаў будзе азначаць легітымацыю Астравецкай АЭС, — цытуе словы прэзідэнткі Літвы Далі Грыбаўскайце агенцтва DELFI. — Гэта азначала б, што мы звязваем свае рукі, і мы не зможам патрабаваць, каб Беларусь закрыла гэтую электрастанцыю».
Прэзідэнтка Літвы адзначыла, што яе словы датычаць і прапановы Беларусі дамовіцца аб стварэнні сумеснай сістэмы маніторынгу Астравецкай АЭС, якую раней станоўча ацаніў прэм’ер-міністр Літвы Саўлюс Скверняліс.
«Супрацоўніцтва з Беларуссю ў пытанні па Астраўцу азначала б юрыдычнае прызнанне Астравецкай АЭС і звязваньне нам рук, — сказала Грыбаўскайце. — Праблема не ў бяспецы электрастанцыі, а ў тым, што абраная пляцоўка небяспечная. Гэта азначае, што дадзеная электрастанцыя наогул не можа функцыянаваць і такой павінна быць палітычная мэта Літвы».