Завершаны прыём твораў на конкурс “Экслібрыс” імя Янкі Маўра

1 жніўня завяршыўся прыём заявак на конкурс дзіцячай літаратуры “Экслібрыс” імя Янкі Маўра. За права быць прызнанымі лепшымі аўтарамі твораў для дзяцей, а таксама за прызы ад  кампаніі Prestigio пазмагаюцца 117 маладых пісьменнікаў, перакладчыкаў, мастакоў.



Сярод удзельнікаў — жыхары Беларусі, Расіі, Украіны, Балгарыі ва ўзросце да 40 гадоў. Канкурсанты прапанавалі творы ў самых розных жанрах — казкі і п’есы ў вершах, тэксты песень для дзяцей, апавяданні ў стылі фантастыкі, фэнтэзі або на аснове фальклору, коміксы, ілюстраваныя аповесці і раманы і нават цэлыя праекты кніг.

На конкурс дасланыя творы замежных пісьменнікаў, перакладзеныя на беларускую мову з англійскай, італьянскай, нямецкай, украінскай, польскай, нямецкай, фінскай, шведскай моў.

Ацэньваць работы будзе журы ў складзе Алены Масла, Алеся Пашкевіча, Людмілы Рублеўскай, Пятра Васючэнкі, Сержа Мінскевіча.

Вынікі конкурсу будуць абвешчаныя ў пачатку верасня. За ходам яго правядзення сачыце на сайце ГА “Саюз беларускіх пісьменнікаў” , а таксама на старонках у сацыяльных сетках https://www.facebook.com/litbel, http://vk.com/sbp1934.

Прэс-служба ГА “Саюз беларускіх пісьменнікаў”