Калісьці атмасфера Марса была багатая кіслародам

Мінералы з паверхні Марса паказваюць на тое, што ў старажытнасці атмасфера гэтай планеты ўтрымлівала значна больш кіслароду. Ужо даўно было вядома аб высокім утрыманні аксіду жалеза ў марсіянскіх пародах, дзякуючы якому Марс і атрымаў мянушку «Чырвоная планета». Але цяпер навукоўцы паведамілі аб наяўнасці сярод мінералаў Марса іншага рэчыва, для утварэння якога патрабуецца больш высокая канцэнтрацыя кіслароду.

Як паведаміла на штогадовай канферэнцыі Еўрапейскага геафізічнага саюза ў Вене Агнес Кузэн (Agnès Cousin) з Інстытута астрафізікі і планеталогіі ў Тулузе, марсаход Curiosity выявіў у грунце марсіянскага кратэра Гейл высокае ўтрыманне аксіду марганца. Для ўтварэння гэтых парод патрабавалася наяўнасць на планеце вады і куды большай колькасці кіслароду ў паветры, чым раней меркавалі навукоўцы. Даследнікам пакуль невядомы дакладны ўзрост парод, але яны спадзяюцца вызначыць яго пасля апрацоўкі іншых дадзеных марсахода.

Сучасная атмасфера Марса складаецца на 95% з вуглякіслага газу, а кіслароду ў ёй змяшчаецца не больш за 0,13%.