Алесь Дзянісаў прэзентаваў «Кароткую гісторыю Беларусі» (ФОТА)

Культура 14.09.2017

Прэзентацыя альбому з 24 песняў прайшла з удзелам сляпога паэта ды аўтара тэкстаў Алеся Чобата, якога адмыслова прывезлі са Скідзеля.

Гэта першая прэзентацыя альбому, дзе сабраныя песні, якія кранаюць ці не самыя вострыя моманты нашай гісторыі: падзелы Рэчы Паспалітай, паўстанні, Грамадзянскую і ІІ Сусветную вайну, дзейнасць «Грамады» і Халакост.

Алесь Чобат
Аўтараў усіх вершаў да песняў з’яўляецца паэт і колішні палітычны дзеяч пачатку 1990-х Алесь Чобат, які з часам страціў зрок і вядзе самотны лад жыцця ў прыватным дамку ў Скідзелі. Ягоны зборнік некалі трапіў у рукі Алесю Дзянісаву, які, як кажуць, «не змог прайсці міма» і пачаў перакладаць вершы на музыку.

Па-першае, я лічу вершы Чобата геніяльнымі, — распавядае Алесь Дзянісаў, — Па-другое, я падтрымліваў і буду падтрымліваць гарадзенскіх паэтаў і творцаў, іх хапае! Менавіта таму, мае вочы глядзяць на Горадню, я шукаю сэнсы і натхненне тут.

На прэзентацыю сабралося блізка сотні чалавек. Акрамя Алеся Чобата завітала і жывы класік заходнебеларускай паэзіі Данута Бічэль. Дзянісаў, зрэшты, пісаў песні і на яе вершы, але лірычнай тэматыкі. У выпадку з Чобатам жа пайшлі акурат жорсткія «мужчынскія» тэмы, падказаныя гісторыяй краю.

Большасць песняў прысвечаныя глыбокай гісторыі, але ёсць і пласт, які закранае познесавецкі час. І мне гэта блізка, бо я гэта таксама перажыў. У вершы «Мутанты» ёсць радкі пра паміраючых правадыроў… Дык я гэта памятаю! Мы ў школе вырашалі, хто з кіраўнікоў КПСС круцейшы, сышліся на Брэжневе: пасля яго смерці мы ажно тры дні на заняткі не хадзілі! — дадае з усмешкай музыка.

Наступны выступ Алеся Дзянісава з прэзентацыяй альбому «Кароткая гісторыя Беларусі» адбудзецца ў Віцебску 16 верасня ў краме «Князь Вітаўт» а 18.00.