25 гадоў грыміць у Беларусі “Грымата”

Сваё 25-годдзе народны ансамбль народнай музыкі і песні “Грымата” Слонімскага РДК, якім кіруе Валянціна Шаронава, адзначыў вялікай канцэртнай праграмай.



Ансамбль вядомы не толькі на Слонімшчыне, але і па-за яе межамі. Ён з’яўляецца лаўрэатам і пераможцам шматлікіх абласных, рэспубліканскіх і міжнародных конкурсаў, фестываляў і святаў. Народны ансамбль з поспехам выступаў у Малдове, Літве, Польшчы, Расіі. Асабліва штогод слонімскі калектыў шчыра вітаюць на Беласточчыне. У юбілейны вечар кіраўнік “Грыматы” Валянціна Шаронава адказала на некалькі пытанняў нашага карэспандэнта.

— Спадарыня Валянціна, ваш калектыў спявае песні толькі на роднай мове?

— Так. Мы спяваем толькі беларускія народныя песні, патрыятычныя беларускія і сучасныя песні на роднай мове. Многія песні суправаджаюцца танцавальнымі нумарамі. Нас цяпер 17 чалавек, а было ўсяго дзевяць. Абнаўляецца калектыў, уводзяцца новыя інструменты, мяняецца рэпертуар, але стараемся трымаць высокі прафесійны ўзровень, творчы пошук і высокае выканаўчае майстэрства.

— Што сабой уяўляюць сёння сольныя канцэрт “Грыматы”?

— Нашы сольныя канцэрты могуць працягвацца 1,5–2 гадзіны — усё залежыць ад гледачоў і слухачоў. Спявачкі “Грыматы” Ірына Бурсевіч і Ала Баравік часта выступаюць як салісты. Але ўсё ў калектыве ўзаемазвязана. У нас выступленні строга па праграме, у комплексе, паводле належнага сцэнарыя. Дарэчы, многія песні суправаджаюцца танцавальнымі нумарамі. 

— А ці ёсць у “Грыматы” свае хіты, якія найбольш цешаць людзей?

— Вядома ж! Гэта новы хіт сезона — “Купальская песня” на музыку Захлеўнага. Таксама ўсім падабаецца песня “У сенях, сенях...”. Людзі ўжо шмат гадоў з асобым настроем слухаюць нашу славутую “Шыпшыну” і песню “Ой у лузе, пры даліне”. І вельмі добрая новая народная песня “Як пайду я к кавалю”, якую адразу палюбілі слухачы.

— Ці можна песні “Грыматы” паслухаць на дысках?

— Мы ўжо маем тры дыскі песень. Сярод іх — вельмі арыгінальныя прыпеўкі, якія самі напісалі. Яны адлюстроўваюць характар кожнага ўдзельніка ансамбля. Новы дыск мяркуем выдаць у гэтым годзе, і ён будзе мець назву “Купальскія зоры”. Будзе на ім шмат лірычных, народных і аўтарскіх песень.

Фота аўтара