Знайшоўся беларус, які знік у 2007-м у Маскве. Ён патрапіў у рабства

Андрэй Купрэенка амаль паўтара дзясятка гадоў правёў у рабстве на Паўночным Каўказе.

Расійская некамерцыйная арганізацыя «Альтэрнатыва» паведаміла пра знойдзенага праз 14 гадоў пасля знікнення беларуса. Андрэй Купрэенка, 1985 года нараджэння, паводле адной з першых арыентыровак «Альтэрнатывы», з'ехаў у Маскву на заробкі ў 2007-м і знік. Месца яго знаходжання было невядомае ўсе наступныя гады.

Прадстаўнік «Альтэрнатывы» Максім Ваганаў паведаміў у Twitter, што Андрэя знайшлі. Ён паедзе дахаты праз амаль 15 гадоў.

Падрабязнасці таго, як яго знайшлі і дзе, арганізацыя апублікуе пазней. Паводле папярэдніх даных, беларуса ўтрымлівалі гэты час на тэрыторыі Дагестана, Чачэніі і Кабардзіна-Балкарыі.

Паводле «Свабоды».