Судаленка: З 2020 года больш за 50 тысяч чалавек былі затрыманыя па палітычных матывах
На канферэнцыі «Новая Беларусь 2024» прадстаўнік Праваабарончага цэнтра «Вясна» Леанід Судаленка распавёў пра статыстыку затрыманняў беларусаў па палітычных матывах з 2020 года. На яго думку, рэпрэсіі ў краіне не слабеюць, піша Люстэрка.
Леанід Судаленка. Фота прэс-службы Святланы Ціханоўскай
Юрыст цэнтра "Вясна" Леанід Судаленка падчас свайго выступу на панэльнай дыскусіі «Дзеянні для палітвязняў у 2025 годзе» на канферэнцыі «Новая Беларусь» прэзентаваў свежыя даныя праваабаронцаў пра затрыманых па палітычных матывах, пачынаючы з 2020 года.
З пачатку прэзідэнцкай кампаніі больш за 50 тысяч чалавек былі затрыманыя па палітычных матывах.
За гэты час больш за 3380 чалавек былі прызнаныя палітычнымі вязнямі.
З іх амаль 2 тысячы чалавек былі вызваленыя, гэта значыць з'яўляюцца былымі палітвязнямі.
З гэтых дзвюх тысяч чалавек каля 1134 цалкам адбылі пакаранне і былі вызваленыя (астатнія знаходзіліся ў СІЗА і/або пакінулі краіну, не адбываючы пакарання).
Леанід Судаленка таксама распавёў, што на сённяшні дзень праваабаронцам «Вясны» вядома мінімум пра 5472 людзей, асуджаных па палітычна матываваных крымінальных справах.
— Гэта выпадкі як палітычных зняволеных, так і тых, хто не знаходзіўся да суда ў месцах несвабоды або атрымаў пакаранне, не звязанае з пазбаўленнем волі, — дадаў праваабаронца.
Судаленка таксама распавёў пра колькасць палітычных крымінальных прысудаў у Беларусі ў разбіўцы па гадах:
-
2020 год — 900 чалавек;
- 2021 год — 1225 чалавек;
- 2022 год — 1242 чалавекі;
- 2023 год — 1603 чалавекі.
— Як бачна, за апошнія тры гады назіраецца рост асуджаных па палітычных матывах, — рэзюмаваў праваабаронца «Вясны». — Рэпрэсіі не слабеюць, і нічога не кажа, што яны спыняцца найбліжэйшым часам.