Студэнт віну прызнаў, але міліцыянты ўпэўненыя, што пацярпелі не ад яго

У судзе Маскоўскага раёна Мінска пачаўся разгляд крымінальнай справы ў дачыненні да Івана Дацышына. 21-гадовы хлопец — студэнт чацвёртага курса факультэта радыёфізікі і камп'ютарных тэхналогій БДУ. Яго абвінавацілі паводле ч.2 арт. 293 Крымінальнага кодэкса. 


Справу разглядае суддзя Таццяна Пірожнікава, дзяржаўнае абвінавачванне падтрымлівае пракурор Валеры Гадуноў.

Што кажа абвінавачаны?

Іван Дацышын цалкам прызнаў віну. Ён распавёў, што ў ноч з 11 на 12 жніўня сапраўды знаходзіўся на праспекце Дзяржынскага каля парка Паўлава. Яны з сябрамі ўбачылі, што каля скульптуры зубра стаяць людзі і вырашылі падысці да іх. Але яны не паспелі гэтага зрабіць: да прыпынку пад'ехаў аўтобус, адкуль пачалі выбягаць супрацоўнікі органаў унутраных спраў, людзі пачалі разбягацца.
Праз некаторы час Іван вярнуўся на гэтае месца: людзі, якія назіралі за затрыманнямі, кідалі каменне ў аўтобус і супрацоўнікаў. Хлопец таксама спрабаваў дапамагчы і прадухіліць затрыманні: калі аўтобус з людзьмі пачаў рухацца, ён узяў камень і кінуў у бок транспарту. Ён не бачыў, ці трапіў ён куды-небудзь, праз дрэнны зрок. Але Іван падкрэслівае, што ён кінуў толькі адзін камень, бо хацеў, каб міліцыя сышла і не затрымлівала людзей.

Што кажуць пацярпелыя?

У справе двое пацярпелых: Ілля Шалік і Уладзіслаў Дубкоў.
Яны распавялі, што ў той вечар яны ездзілі па горадзе і спыняліся ў кропках масавага скопішча людзей. Каля парка Паўлава большасць людзей збегла, астатнія «паказвалі непрыстойныя жэсты». Адзін чалавек з натоўпу быў настроены агрэсіўна, трымаў у руцэ нейкі прадмет. З ім ён са спіны падышоў да супрацоўнікаў. Шалік падышоў да яго, каб ён не нападаў на яго калег, затым адчуў удар злева па падбароддзі. Убачыўшы гэта, калегі прыйшлі на дапамогу, пачалі затрымліваць людзей. У гэты момант у супрацоўнікаў паляцела каменне, яны сышлі ў аўтобус. У выніку інцыдэнта ў Шаліка дыягнаставаны пералом зуба верхняй сківіцы, у Дубкова — пералом пальца: ён таксама не бачыў, хто кідаў каменне, якое, меркавана, і трапіла яму ў нагу.
Хлопец, якога спрабавалі затрымаць, быў высокі і моцны, не падобны да абвінавачанага. Іван Дацышын не быў затрыманы, шкло ў аўтобусе было выбіта пасля таго, як зачыніліся дзверы. Гэта пацвердзілі абодва пацярпелыя.
Абодва пацярпелыя не маюць прэтэнзій да абвінавачанага, выбачэнні прымаюць.
Пазоў прад'явіў і «Мінсктранс»: шкоду ў 340 рублёў і 84 капейкі за разбіты аўтобус ужо выплацілі.
Разгляд справы працягнецца 17 сакавіка ў 10:30.
spring96.org