Спорт па нядзелях. Калядны турнір адмянілі, бізнесовец Зайцаў сыходзіць з футбола?

Калі ў нядзелю вы не прачнуліся, а ўваскрэслі, значыць, субота ўдалася. Такім вось барадатым анекдотам папярэдзім традыцыйны агляд спартыўных падзей сыходзячага тыдня.

Скандал у футболе. Уладальнік «Руха» выйшаў з выканкама БФФ

Чэмпіянат краіны хутка скончыцца, і інтрыг у ім засталося няшмат. Што чэмпіёнам зноў стане салігорскі «Шахцёр», сумневаў амаль няма. Што барысаўскі БАТЭ не выпадзе з прызавой тройкі — таксама без пяці хвілін факт. Дый мінскае «Дынама» будзе з медалямі — да таго ідзе ўсё і нават больш за тое.

Уласна, менавіта такое трыа прызёраў «НЧ» прагназаваў яшчэ напярэдадні старта сезона, і ў гэтым месцы самы час пабурчэць, маўляў, нявызначанасці ў Беларусі няма нават у спорце.

Аднак жа жарсці напрыканцы чэмпіянату ўспыхваюць. Бо з аднаго боку, гэта закон жанру, а з іншага — ёсць некаторыя далікатныя падставы.

Колькі дзён таму Беларускі фонд спартыўная салідарнасці апублікаваў нашумелую справаздачу аб парушэннях статутаў ФІФА і УЕФА, якія нібыта дазваляе сабе Беларуская федэрацыя футбола. У той частцы, якая датычылася судзейства, быў зроблены тоўсты намёк на тонкія абставіны — што арбітры ненавязліва дапамагаюць асобным камандам перамагаць.

У ліку тых каманд апынулася мінскае «Дынама» — дзяржаўніцкі праект пасля яго экспрапрыяцыі ў апальнага бізнесоўца Юрыя Чыжа. Пазл грамадская думка тут склала хутка: маўляў, раз да клуба неабыякава ставіцца высокае кіраўніцтва (нават Аляксандр Лукашэнка неяк даў «бела-блакітным» наказ выйграць медалі), то і Феміда паслухмяна паддзьмуе ў дынамаўскія ветразі.

Вось на такім канспіралагічным тле 17 кастрычніка ў Брэсце і адбыўся матч брэсцкага «Руху» з тым самым «Дынама». Матч — які меў надзвычайнае значэнне менавіта ў кантэксце змагання за месцы на п’едэстале. Бо «рухаўцы» рваліся ў «прызы», і вочная сустрэча з прамым канкурэнтам магла адкрыць ім ружовыя перспектывы.

Але перспектывы хутчэй закрыліся. Дынамаўцы перамаглі з лікам 3:1. І адкінулі пераследнікаў на бяспечную адлегласць.

Гісторыя, аднак, на тым не скончылася. Таму што надта шмат дроў наламаў падчас гульні Сяргей Краснікаў. Ужо ў першым тайме ён пакінуў берасцейцаў у меншасці — пры неадназначных абставінах быў выдалены абаронца Аляксей Вакуліч. А далей спрэчкі ўзніклі наконт трэцяга гола мінчукоў і эпізода, пасля якога гульцы «Руху» патрабавалі прызначыць пенальці ў вароты «Дынама». Арбітр застаўся няўмольны — хіба што ад шырокай душы нараздаваў гаспадарам поля жоўтых картак.

Ва ўжытку спартыўных журналістаў ёсць тэрмін «скандальны матч» — і паядынак у Брэсце пад гэтае азначэнне патрапіў ідэальна. Тым больш што на наступны дзень слова ўзяў уладальнік «Руху» — сістэмны бізнесовец Аляксандр Зайцаў.

На сайце брэсцкага клуба выйшаў адмысловы зварот прадпрымальніка, у якім той спачатку заўважыў, што ўчорашні матч стаў «яркім прыкладам залежнасці судзейскага корпуса ад рашэнняў кіраўніцтва федэрацыі», потым падкрэсліў, што «месцы ў чэмпіянаце вызначаюцца далёка не па спартыўным прынцыпе», і нарэшце абвясціў «аб сваім добраахвотным выхадзе са складу ўдзельнікаў выканаўчага камітэта БФФ».

Сам па сабе выхад чалавека — хай нават уплывовай фігуры — з выканкаму БФФ сенсацыяй не з’яўляецца. Раней такое ўжо здаралася — грукнуўшы кулаком аб стол, складалі грамадскія паўнамоцтвы і той жа «дынамавец» Чыж, і гаспадар БАТЭ Анатоль Капскі.

І ўсё ж выпадак з Зайцавым — іншага кшталту. Яшчэ колькі месяцаў таму хадзілі чуткі, што бізнесовец можа страціць цікаўнасць да футболу — і скамандаваць сваім актывам «гейм овер». Наўпрост: выйсці з гульні і прыпыніць фінансаванне «Руху». Санкцыі, пад якія патрапіў беларускі «алігарх», такое жаданне ў прынцыпе могуць толькі павялічыць. А персанальная крыўда да федэрацыі — тым больш.

Ды, уласна кажучы, першая ластаўка ў інфармацыйную прастору ўжо паляцела. Партал football.by паведаміў, што на наступны сезон «Рух» можа не заявіцца. Калі так, то адбудзецца чарговае «мінус адзін» у беларускім клубным футболе.

Адмена ў хакеі. Каляднага турніру зноў не будзе

Як і год таму, Беларусь не будзе ўдзельнічаць у «Еўрабачанні». Як і год таму, Калядны хакейны турнір на прызы Аляксандра Лукашэнкі таксама не адбудзецца. Як і год таму, рашэнне аб адмене патлумачылі пандэміяй.

Даслоўна сёлетняя «матывацыйная частка» гучыць так: «Зыходзячы з абмежаванняў на перамяшчэнні, узросту ўдзельнікаў турніру і дзеючых рэкамендацый Сусветнай арганізацыі аховы здароўя па зніжэнні рызык распаўсюджвання вірусных інфекцый».

Гэтыя студзеньскія аматарскія гульні — традыцыя, якой шмат гадоў. Кожны раз пад праваслаўнае Раство ў Мінск прыязджалі сталыя ветэраны з розных краін, каб пакоўзацца па лёдзе, узгадаць маладосць і атрымаць асалоду. Гаспадары — каманда Лукашэнкі — наадварот, ставіліся да спаборніцтваў амбітна, збіралі моцны склад, куды ўключалі і дзеючых гульцоў, і за рэдкім выключэннем упэўнена перамагалі.

Карцінку дзеля такога выпадку рабілі яскравую. Адміністрацыйнымі высілкамі і цэнтралізаванымі намаганнямі арганізатары напаўнялі трыбуны да суцэльных аншлагаў. Дзяржаўныя медыі актыўна і ўзнёсла асвятлялі баталіі. На дзяржаўным ТБ у прайм-тайм турнір называлі аматарскім чэмпіянатам свету. Калі так, то гэта адзіны хакейны ЧС, дзе беларускія хакеісты сапраўды дамінавалі і, як сказалі б раней, паказвалі перавагі айчыннай сістэмы над усімі замежнымі.

Але ж вось: другі год запар чэмпіянату не будзе. Не дзіўна для сучасных беларускіх рэалій — і каронавірус, вядома, толькі частка іх. Дзіўна хіба тое, што аб адмене хакейных «калядаў» абвесцілі так рана — ажно за два з паловай месяцы да старта. Няўжо няма надзей, што да навагодніх святаў чацвёртая хваля сыдзе?

Цішыня на трыбунах. Заўзятараў затрымалі, бо не ўсталі пад гімн

Фота ХК «Нёман»

Мінулымі днямі па старонках СМІ гучна пракаціўся цікавы кейс з хакейнага Гродна. Там адбыўся шараговы матч паміж мясцовым «Нёманам» і немясцовым «Гомелем». Матч як матч — на яго б не звярнулі ўвагі, бо глядач на экстралігу ходзіць слаба, і ўвогуле турнір местачковы і ўзровень яго пасрэдны.

Аднак гэтым разам гульня патрапіла ў мэйнстрым. Прычынай таму — лёс двух заўзятараў, якія вырашылі адседзецца падчас гучання на лядовай арэне дзяржаўнага гімна. Адседзецца не атрымалася — абодвух, 37 і 39-гадовага, затрымалі. І саставілі пратаколы «за парушэнне патрабаванняў да выканання Дзяржаўнага гімна Рэспублікі Беларусь».

Адпаведны артыкул у адміністрацыйным кодэксе сапраўды ёсць («Незаконныя дзеянні ў адносінах да дзяржаўных сімвалаў Рэспублікі Беларусь»), у якасці пакарання там прадугледжаны штраф у памеры «да 5 базавых велічынь». Аднак калі вас гэта здзіўляе, то вось спасылка на тое, што ў горадзе над Бугам гэты выпадак — не першы.

Кантраст у іншым. Раней шэрагі гледачоў на прадмет павагі да дзяржаўнай сімволікі так пільна не маніторылі. І тыя ж журналісты часта на гімн ніяк не рэагавалі — працягвалі працаваць у сядзячым становішчы, уткнуўшыся ў ноутбукі. Цяпер, напэўна, так ужо няможна — альбо можна толькі за дадатковую плату ў пяць базавых велічынь. То лепей, канечне, устаць. Яшчэ лепей — спяваць, а тое ці мала што.