Сям'я Аляксандра Васілевіча страціла з ім сувязь — ужо некалькі тыдняў не прыходзяць лісты

Апошнія два тыдні сям'я бізнэсоўца Александра Васілевіча не атрымлівае ад яго лістоў. Хоць раней праблем з перапіскай не было, распавяла ў інтэрв'ю «Народнай волі» жонка Васілевіча Надзея Зелянкова.

Яна з дочкамі вымушаная была з'ехаць з краіны. Малодшая дзяўчынка нарадзілася, калі Васілевіч, саўладальнік рэкламнага холдынгу Vondel / Hepta, некалькіх папулярных сайтаў і галерэі «Ў», ужо быў у зняволенні.

Чаму няма лістоў, Надзея можа толькі здагадвацца.

«Нават і не ведаю, ці часовая гэта з’ява, але нейкага асаблівага стаўлення да мужа з боку адміністрацыі СІЗА не было», — кажа яна. Успамінае, што аднойчы ўжо была падобная сітуацыя: доўгі час не было ніводнага ліста, а потым прыйшлі адразу дзесяць.

«Я чамусьці думаю, што гэта звязана са здароўем цэнзараў: калі хварэюць, то няма каму чытаць», — выказала здагадку яна.

Аляксандр у апошні час таксама адчуваў сябе не вельмі добра. У яго балела горла, з'явіўся кашаль. Год таму ў яго быў COVID, «хваробу пераносіў досыць складана, а рэабілітацыя доўжылася некалькі месяцаў», успамінае Надзея. Летам ён вакцынаваўся. Аднак выключаць паўторнага захворвання таксама нельга —  у камеры зараз знаходзяцца 12 чалавек.

У пачатку верасня Васілевічу прад'явілі абвінавачванне. У чым менавіта яго абвінавачваюць, сям'я не ведае — з адваката ўзялі падпіску аб невыдаванні матэрыялаў следства. Надзея Зелянкова таксама праходзіць падазраванай па крымінальнай справе. У сярэдзіне кастрычніка Васілевічу працягнулі тэрмін зняволення пад вартай яшчэ на два месяцы — да 27 снежня. Такім чынам ён будзе знаходзіцца ў СІЗА 16 месяцаў. Аб судзе пакуль нічога не чуваць.

Паводле «Еўрарадыё».