Помнік, даруй!
«Перапрасіць у помніка! Менавіта гэтага так не хапае нам у нашай стабільна няшчаснай краіне недавучаных дзяцей, недалечаных хворых, недаабароненых ад гвалту жанчын і рана паміраючых мужчын», — разважае Ганна Севярынец на «Радыё Свабода».
Відэа, у якім мужныя і пільныя міліцыянты ловяць вандала ля помніка Гарадавому (ці з дастаткова вялікай літары напісала я гэтае слова?), тым больш відовішча, дзе белакуры вандал шчыра просіць выбачэння ў помніка, узрушыла мяне да самых глыбінь душы.
Так! Перапрасіць у помніка! Менавіта гэтага так не хапае нам у нашай стабільна няшчаснай краіне недавучаных дзяцей, недалечаных хворых, недаабароненых ад гвалту жанчын і рана паміраючых мужчын. Ідэя вялікага, агульнанацыянальнага фестывалю перапрашэння ў помнікаў сама сабой узнікла і запалала паходняй у маёй настаўніцкай галаве.
У першую чаргу я б хацела запрапанаваць нашым мужным і пільным абаронцам помнікаў пасадзіць у сваю машыну Леаніда Зайдэса — і няхай ён публічна і шчыра выбачыцца перад помнікам усім расстраляным у Курапатах. Ад самага лета да яго ганебнага рэстарану едуць-ядуць розныя асобы, якім ніяк не едзецца і не есца ў іншых, прыдатных для ежы, месцах — выбачацца можна да самага рання.
Потым давайце збярэм некалькі аўтобусаў тых, хто адмаўляецца адкрываць беларускія групы ў садках, беларускія класы ў школах, усіх, хто адчайна кладзецца на шляху выкладання беларускай гісторыі па-беларуску ў беларускіх школах — і завязем іх выбачыцца перад помнікам літары «Ў».
Недалёка ад гэтага помніка можна экскурсійныя аўтобусы яшчэ раз спыніць — і тым жа складам выбачыцца перад помнікам беларускай дзяржаўнасці, якая насамрэч пачынаецца не ад 1917 года, а крыху раней, раней, помнік, мы ўсведамілі, мы цяпер ведаем, і ўсім кажам, выбачай нам, помнік!
Велічны і трагічны, чакае ля сваіх ног складальнікаў праграм па беларускай літаратуры помнік Янку Купалу — доўга, доўга, са слязьмі павінны выбачацца перад ім складальнікі тых праграм, у якіх усё менш беларускай літаратуры, і ўсё больш белліту.
Міністр па падатках і зборах, а таксама правяральнікі ягонага міністэрства няхай выбачацца перад помнікам гандлярцы на Камароўцы — божухна мой, колькі церпіць тая гандлярка ад празмерна прагных збіральнікаў і правяральнікаў!
Міністэрства культуры, а таксама кіраўніцтва Спецкамбінату да вясны не ўправяцца выбачацца перад гранітнымі нашлёпкамі, якія ляжаць цяпер на Вайсковых могілках на месцах, дзе раней стаялі помнікі.
Ну, і фінальным мерапрыемствам я б арганізавала вялікую вандроўку ў Амерыку, краіну капіталістаў і буржуа, няхай бы адплыў туды ад якога зручнага порту вялікі лайнер, на які сабралі б мы чыноўніцтва рознага ўзроўню — і памкнулі б яны па акіянскіх хвалях да берагу Нью-Ёркскай бухты, каб горача і гучна выбачыцца перад статуяй Свабоды.
Аднаго не магу прыдумаць: перад якім помнікам запрапанаваць выбачыцца пільным і мужным міліцыянтам?