МУС скардзіцца на «рост нагрузкі на супрацоўнікаў»

МУС скардзіцца на рост нагрузкі на супрацоўнікаў. Яна звязаная з пратэстнымі акцыямі, якія рэгулярна праходзяць у беларускіх гарадах пасля выбараў.

«З улікам агульнапалітычных падзей у краіне мы вымушаныя забяспечваць ахову грамадскага парадку. У разы ўзрасла нагрузка на ўсе падраздзяленні. Мы вымушаныя працаваць у асаблівых умовах»— заявіў у эфіры АНТ в. а. начальніка Галоўнага ўпраўлення крымінальнага вышуку крымінальнай міліцыі МУС Беларусі Максім Свірыд.

Ён таксама заявіў, што ў 2020 годзе адзначаецца рост забойстваў, цяжкіх цялесных пашкоджанняў, злачынстваў у сферы высокіх тэхналогій, разбойных нападаў.

Пры гэтым 7 верасня падчас дакладу Аляксандру Лукашэнку старшыня Следчага камітэта Іван Наскевіч заявіў аб зніжэнні ўзроўню злачыннасці на 8% на фоне эпідэміі і грамадска-палітычных мерапрыемстваў.

Свірыд паскардзіўся, што з-за работы па забеспячэнню грамадскага парадку крымінальны вышук у поўнай меры не можа вырашаць штодзённыя задачы.

Паводле REFORM.by