КДБ зладзіў вялікі "хапун". Хронікі рэпрэсій 2 красавіка

Грамадства

Паводле інфармацыі праваабаронцаў, 20-21 сакавіка адбыўся масавы рэйд КДБ па розных гарадах Беларусі. Па яго выніках частка людзей была змешчаная ў СІЗА КДБ. Вядома, што некаторым затрыманым інкрымінуюць «тэрарыстычныя» артыкулы. Больш падрабязнасцяў пакуль няма.  «Новы Час» сабраў асноўную інфармацыю пра палітычны пераслед у Беларусі па стане на 2 красавіка.

1_1097_1.png

Чарговае папаўненне Спіса экстрэмісцкіх матэрыялаў

У яго трапілі:

  • Telegram-каналы і чаты «Дикі шершні | Ударні дроникамікадзе», «Витебские Вести»;
  • Instagram старонкі «marina.zelenaja», «bhb_ataman»;
  • YouTube-канал «Ямницкий Флот»;
  • Сайт і старонкі ў сацсетках ініцыятывы «Цэнтр новых ідэй»;
  • Старонкі ў «Аднакласніках» «Игорь Козлов», «Бандеровский Хохол», «Александр Моисеев»;
  • Старонкі ў TikTok «ПАЛIТВЯЗЕНЬ», «Kalinouski Polk».

Прапагандысты паказалі новага абвінавачанага за «фінансаванне экстрэмізму» 

У фільме, які анансаваў АНТ, паказваюць сюжэты з двума ўжо вядомымі палітвязнямі — Міхаілам Фандо (атрымаў 5 гадоў калоніі) і Аляксандрам Дорагакупцом (атрымаў 5,5 гадоў калоніі і штраф у 2,1 млн рублёў).

У анонсе прадстаўнік Дзяржкантролю Уладзіслаў Ларыёнаў кажа, што ў мінулым годзе выяўлена каля 70 выпадкаў фінансавання «экстрэмісцкай дзейнасці». Сярод атрымальнікаў дапамогі называюцца Полк Кастуся Каліноўскага і Байсол.

Называюць у фільме і новае імя — Васіль Арэшка. Хлопец родам з Салігорска. Ягоны ўзрост у сацсетках не ўказаны, але яму прыкладна 30 гадоў, калі меркаваць па ўзросце яго сяброў Укантакце, піша «Наша Ніва».

Вядома, што ў Польшчы Арэшка працаваў HR-спецыялістам — шукаў людзей для ўладкавання на працу. Перыядычна ездзіў у Беларусь. Калі ён вярнуўся апошні раз, невядома, але затрыманы ён быў некалькі месяцаў таму. Цяпер Арэшка ў СІЗА.

МУС вярнула магчымасць праверкі абмежаванняў на выезд з Беларусі анлайн

Цяпер сайт міністэрства выглядае, як і раней. Ніякіх тлумачэнняў, куды знікала магчымасць праверкі, у МУС не далі.

Учора журналісты @mediazona_by заўважылі, што МУС прыбрала са свайго сайта магчымасць праверкі сябе на наяўнасць забароны на выезд з Беларусі.

У Мінску затрымалі брата беларускага добраахвотніка

У Мінску затрымалі малодшага брата беларускага добраахвотніка Дзяніса Урбановіча.

Паводле інфармацыі Белсат, супрацоўнікі КДБ уварваліся ў кватэру ў Мінску, дзе пражываў Максім Урбановіч, малодшы брат Дзяніса Урбановіча, які ад самага пачатку поўнамаштабнага ўварвання расійскіх войскаў ва Украіну ваюе ў складзе УСУ з пазыўным Ваўкалак.

Вядома, што пасля правядзення ператрусу Максіма затрымалі. Паводле папярэдніх звестак, кватэру, дзе ён пражываў са сваёй дзяўчынай, апячаталі.

Дзе цяпер утрымліваецца мужчына, невядома. Невядома таксама, што было прычынай ператрусу і затрымання. Дзяніс Урбановіч даўно не мае стасункаў са сваім братам і мінімум два гады з ім не размаўляў. Пра гэты выпадак ён нічога не ведае.