У Слуцку ўшанавалі герояў Слуцкага збройнага чыну (фота)
У Слуцку 24 лістапада адбыліся шэсце і мітынг, прысвечаныя 98-годдзю Слуцкага збройнага чыну. Удзельнікі мерапрыемства ўшанавалі памяць тых, хто ў лістападзе і снежні 1920 года ўзброена паўстаў супраць бальшавіцкай улады.
Мітынг і шэсце былі дазволены слуцкімі ўладамі. Але нягледзячы на гэтую акалічнасць, мерапрыемства прайшло не на галоўнай вуліцы горада, а каля рэчкі і ў парку каля стадыёна.
Акцыю арганізавалі актывісты руху салідарнасці «Разам», руху «За Свабоду», партыі БНФ. Сярод удзельнікаў — жыхары Слуцку, Мінску, Салігорску, Старых Дарог.
На мітынгу прысутнічала шмат міліцыянтаў, але яны не заміналі правядзенню мерапрыемства. Шэсце і мітынг прайшлі пад воклічы "Жыве Беларусь!" пад бел-чырвона-белымі сцягамі.
У другой палове дня ў Слуцкім Доме культуры распачаўся канцэрт "За Случчыну!", прысвечаны Дню Герояў. Падчас імпрэзы выступілі салігорскі гурт «Харачакра», мінская каманда ZANZIBAR, Андрэй Хадановіч і хэдлайнер Лявон Вольскі. На пачатак канцэрту ўжо сабралося пад двесці чалавек. Мерапрыемства прайшло без інцыдэнтаў. Толькі падчас канцэрту слуцкія міліцыянты папрасілі ўдзельнікаў гурту Zanzibar, якія заўсёды выступаюць у масках, зняць іх.
