Барысаў: на выбарчым фронце без пераменаў

Барысаўскі назіральнік распавёў, што магчымасці прысутнічаць пры праверцы подпісаў вылучэнцаў яму не прадставілі, і нават не адказалі на ягоную заяву, замест гэтага старшыня параіў «дамаўляцца з сябрамі камісіі».

Пасяджэнне Барысаўскай раённай выбарчай камісіі, на якім адбывалася рэгістрацыя кандыдатаў у дэпутаты райсавета, прайшло 18 cтудзеня па-сямейнаму, без гучных сенсацый: сярод зарэгістраваных кандыдатаў — прадстаўнікі дырэктарскага корпусу, старшыні арганізацый ды іншыя начальнікі. Трое вылучэнцаў, якіх можна аднесці да незалежных, у тым ліку — два ад партыі БСДП (Грамада), кандыдатамі ў дэпутаты не зарэгістраваныя.

Барысаўскі назіральнік Алег Мацкевіч адзначае, што магчымасці прысутнічаць пры праверцы подпісаў вылучэнцаў яму не прадставілі, і нават не адказалі на ягоную заяву.

Яшчэ 10 студзеня ён звярнуўся пісьмова ў Барысаўскую раённую выбарчую камісію з просьбай дазволіць прысутнічаць на працэдуры праверкі подпісаў у падпісных лістах прэтэндэнтаў. Аднак пісьмовага адказу на зварот А. Мацкевіч не атрымаў.

На чарговым пасяджэнні выбарчай камісіі 16 студзеня, на якім прысутнічаў назіральнік, сябры камісіі адабралі з дакументаў, пададзеных на рэгістрацыю, пэўную колькасць лістоў для праверкі подпісаў і размеркавалі іх паміж сабой. У канцы пасяджэння Мацкевіч пацікавіўся ў старшыні камісіі П. Жуга, якім чынам вырашаецца яго пісьмовая просьба. Адказ быў такі: “Дамаўляйцеся з сябрамі камісіі”.

“Але як я магу з імі дамовіцца, калі яны будуць правяраць подпісы па-за пасяджэннем камісіі?” — задаў слушнае пытанне назіральнік. “А гэта вашая справа” — прагучаў лаканічны адказ старшыні камісіі.

"Праваабаронцы за свабодныя выбары"