Асобная думка. Бандыяна-2025

 Я спецыяльна не звяртаў увагі на абставіны і сам факт знікнення Анжалікі Мельнікавай да сёння. Досыць мала інфармацыі і яшчэ менш бясспрэчных фактаў. Тым не менш, з нямецкай акуратнасцю (ніякіх пытанняў да паважаных немцаў, толькі спасылка да іх педантычнасці і парадку) штотыдзень вельмі дазавана ў інфаполе ўкідваецца яшчэ кропелька, якую нібыта атрымалася здабыць. Цікава, што гэтыя ўкіды ніяк не каментуюцца афіцыйнымі асобамі, але ж маланкава распаўсюджваюцца па медыя як рэальныя факты.

Знік чалавек. Не звычайны мігрант, не працоўны на складзе, не кур’ер. Знікла  публічная асоба, якую шмат хто ведаў (апроч мяне да апошняга часу) і якая, як вызначылася, мела датычнасць да размеркавання неблагіх грошай. Каму як, канешне, але ж для мяне і шмат для каго яшчэ гэта вялікія грошы. З пункту гледжання адукаванага і здарова разважаючага чалавека паставіць на кон усё дзеля 150 тысяч даляраў ці нават еўра ці фунтаў — пытанне не тое, што несур’ёзнае, але больш смешнае. Аніводны медыйны чалавек з досведам Мельнікавай такое нават разглядаць не будзе. Каб вы разумелі — гэта кошт 2+1 (звычайная трохпакаёўка) кватэры на албанскім узбярэжжы і нават не на беразе мора. Без рамонту і тэхнікі. Без канапаў і бара на балконе з відарысам на захад. Ну каб вы разумелі...

Пакінем грошы і звернемся да самой Мельнікавай і таго, што аб ёй пішуць. Шмат, так. Але ж прыгадваю публікацыі ад першай да апошняй і не пакідае адчуванне прагляду нейкага кепскага савецкага шпіёнскага серыялу, сцэнар якога пішацца шэрымі дзядзямі ў шэрых жа строях пад добрым і адначасова суворым позіркам нашага, на жаль, суайчынніка Фелікса, Эдмундава сына. Пакрысе з самога пачатку распрацоўвалася версія аб спартыўным хлопцы, у якога імгненна закахалася нашая фігурантка. Спачатку гэта былі літаральна словы, потым версія выбілася ў асноўныя і цяпер, дзякуючы медыя і рэакцыям чытачоў, канчаткова прынята за галоўную і бясспрэчную.

А фактаў не багата. Адныя толькі «нібыта». Так, ёсць квіткі на Кубу, Шры-Ланку, Дубай. У адным самалёце ляцеў агент, назад таксама... Курсы «пікапу», даруй Божа... Вы вось зараз сур’ёзна? Ну калі так, то спадар Латушка вокамгненна павінен сысці з палітычнага гарызонту назаўсёды! Гэта ж ягоная крэатура і ён за яе павінен адказваць. Гэтага не адбываецца, і нас ужо павінны браць пэўныя сумневы ў самой асобе Латушкі... Але ж не, ён бадзёра працягвае каментаваць абставіны ды акалічнасці знікнення Мельнікавай нават пасля знікнення грошай.

Цікава, што большасць трыгерыць знікненне грошай. Нават больш, чым знікненне самой Мельнікавай. Паглядзіце самі — колькі навінаў было прысвечана грошам і колькі самому факту знікнення Анжалікі без згадкі пра грошы. Паглядзелі? Убачылі? Параўналі? Віншую!

Магчыма, беларускі Бонд і ляцеў у самалёце на Кубу разам з маці Мельнікавай. Магчыма, частаваў кактэйлямі. Магчыма, была потым таямнічая ноч на кубінскім пляжы з гарачым ромам... Магчыма, быў працяг. Мы ўсе людзі-чалавекі. Нават калі верыць у гэты серыял — ну хто з нас адмовіўся бы і пайшоў увечары ў гатэль спяваць на ноч «Магутны Божа» і класціся спаць? 

Можа неяк так і было, а можа неяк па іншаму, але ж фактаў няма! Няма нічога, апроч здагадак ды версій. Я вось сам  пару год таму ехаў у цягніку з адыёзным Сяргеем Кунцэвічам і мы выйшлі нават на адным прыпынку. Мне цяпер што рабіць?

Дагэтуль адным неабвержным фактам з’яўляецца толькі тое, што знік чалавек. Знікла Анжаліка Мельнікава. Магчыма, таксама зніклі грошы з рахунку, які яна асабіста кантралявала і на які паступалі грошы на дзейнасць «Кіберпартызанаў» ды нейкіх іншых структур, але ж гэта ніяк не пацверджана. Іншых фактаў няма! 

Неяк так.