У Беларусі з 1 красавіка павышана базавая арэндная велічыня

У Беларусі з 1 красавіка базавая арэндная велічыня павышана — з 54 тыс. да 86 тыс. рублёў, гэта значыць на 60%. Гэта прадугледжана адпаведнай пастановай Саўміна ад 13 сакавіка 2013 года № 172. Дакумент прыняты ў адпаведнасці з указам ад 29 сакавіка 2012 года № 150 "Аб некаторых пытаннях арэнды і бязвыплатнага карыстання маёмасцю".



Паводле дадзеных Белстата, індэкс спажывецкіх коштаў за 2012 год у адносінах да 2011 года склаў 159,2%. З улікам названага індэксу і была разлічана сума новай базавай арэнднай велічыні. Ужыванне зацверджанага новага памеру базавай арэнднай велічыні ў разліках арэнднай платы дазволіць прывесці яе памер у адпаведнасць са змяненнем індэксу спажывецкіх коштаў за 2012 год.
 

Базавая арэндная велічыня выкарыстоўваецца ў разліках арэнднай платы пры арэндзе плошчаў, якія знаходзяцца ў дзяржуласнасці.
 

Гэта датычыцца і ўласнасці гаспадарчых таварыстваў, у статутных фондах якіх больш за 50% акцый (доляй) знаходзіцца ва ўласнасці Беларусі і (або) яе адміністрацыйна-тэрытарыяльных адзінак, а таксама капітальных пабудоў (будынкаў, збудаванняў), ізаляваных памяшканняў, машына-месцаў, іх частак, уключаючы капітальныя будынкі (збудаванні), ізаляваныя памяшканні, іх часткі на рынках і ў гандлёвых цэнтрах.
 

З 1 красавіка па новай стаўцы будзе выплачвацца і запазычанасць па арэнднай плаце за папярэднія перыяды.
 

Як перадаваў Тэлеграф, рост базавай арэнднай велічыні з 1 красавіка на 60% да 86 тыс. рублёў прывядзе да падаражання прадукцыі і паслуг, якія рэалізуюцца прадпрымальнікамі на 7-12%. Пра гэта заявіў 21 сакавіка старшыня прэзідыума Рэспубліканскай канфедэрацыі прадпрымальніцтва Беларусі Уладзімір Карагін.

telegraf.by