Беларусь распрадае свой лес? У Кітай адправяць піламатэрыялы на рэкордныя 8,8 млн USD
На Беларускай універсальнай таварнай біржы (БУТБ) прайшлі найбуйнейшыя спецыяльныя экспартныя таргі — на рынак Кітая рэалізаваныя больш за 30 тысяч кубаметраў піламатэрыялаў іглічных парод на агульную суму 8,8 млн USD, піша realt.by.
Ілюстрацыйнае фота, Дзмітрый Дзмітрыеў
Спецыяльныя гандлёвыя сесіі па рэалізацыі піламатэрыялаў у Кітай праводзяцца на БУТБ са снежня 2020 года пры падтрымцы Мінлясгаса. Гэта дазваляе дыверсіфікаваць экспартныя пастаўкі беларускай пілапрадукцыі з традыцыйнага напрамку — краін Еўрапейскага Саюза — у іншыя перспектыўныя рэгіёны.
— За 5 месяцаў гэтага года на "кітайскіх спецсесіях" рэалізаваная пілапрадукцыя на суму 8,4 млн USD, а з улікам апошняй сесіі — 17,2 млн USD. Для параўнання за ўвесь мінулы год агульны экспарт піламатэрыялаў у Кітай па выніках спецыяльных і звычайных гандлёвых сесій склаў 12,8 млн USD, — адзначылі ў прэс-службе БУТБ.
Галоўная асаблівасць спецыяльных таргоў у тым, што лоты піламатэрыялаў выстаўляюцца на некалькіх базісах пастаўкі, што дазваляе пакупніку выбіраць найбольш зручны пункт прыёмкі тавару. Як правіла, гэта буйныя марскія парты і чыгуначныя станцыі.