Банкі масава зніжаюць стаўкі па тэрміновых рублёвых укладах

 Найбуйнейшыя беларускія банкі абвясцілі пра зніжэнне працэнтных ставак па тэрміновых рублёвых укладах фізічных асоб. Грашова-крэдытныя ўстановы зменшылі даходнасць па рублёвых дэпазітах на 5 працэнтных пунктаў.



У прыватнасці адзін з буйнейшых трымальнікаў сродкаў насельніцтва — "Белаграпрамбанк" — 13 студзеня знізіў працэнтную стаўку па тэрміновым рублёвым укладзе "Вялікія грошы" з 50 да 45%. 

"Беларусбанк" на аналагічны крок пайшоў 10 студзеня: стаўка па тэрміновым рублёвым укладзе "Гарантаваны даход" была зніжаная таксама з 50 да 45% гадавых. 

"Белгазпрамбанк", які ўваходзіць у шасцёрку вядучых банкаў краіны, зменшыў стаўку па тэрміновым рублёвым укладзе "Рацыянальны" з 49 да 44%. 

Зніжэнне працэнтных ставак у камерцыйных банках адбылося пасля рашэнняў Нацбанка па пытаннях працэнтнай палітыкі, якія былі прынятыя на мінулым тыдні. 

9 студзеня паводле рашэння рэгулятара верхняя мяжа працэнтных ставак па дэпазітах юрыдычных асоб была зніжаная з 50 да 40% гадавых. Адначасова з гэтым Нацбанк адзначаў, што па меры далейшай стабілізацыі сітуацыі на фінансавым рынку стаўкі па дэпазітах фізасоб таксама будуць змяншацца. 

Вышэйпералічаныя захады, як адзначаў Нацбанк, скіраваныя на "фарміраванне ў эканоміцы ўзроўню працэнтных ставак, якія забяспечваюць фінансавую і макраэканамічную стабільнасць, запаволенне інфляцыі, а таксама баланс інтарэсаў укладчыкаў і пазычальнікаў".

 
У снежні 2014 года на фоне рэзкага павелічэння попыту насельніцтва на замежную валюту Нацбанк прыняў рашэнне практычна аб двухразовым павелічэнні працэнтных ставак на дэпазітным рынку — да 50% гадавых. У сувязі з гэтым банкі вымушаныя былі пайсці на значнае павышэнне кошту крэдытных рэсурсаў.
Дзмітрый Заяц, БелаПАН