Польшча. Замаляваныя ўказальнікі на беларускай мове
Мясцовыя беларусы не выключаюць, што гэта выхадкі польскіх крайне правых сіл.
Фота: Польскае радыё «Беласток»/Міхал Сцепанюк
Невядомыя вандалы замалявалі двухмоўныя ўказальнікі ў гміне Орля, што на Беласточчыне.
Пры гэтым была замаляваная толькі беларуская назва мясцовасці, польская засталася некранутай, паведамляе рэгіянальнае Польскае радыё «Беласток».
Мясцовыя беларусы не выключаюць, што гэта выхадкі польскіх крайне правых сіл.
Гэта чарговы акт вандалізму ў гміне Орля. Раней беларускія назвы былі замаляваныя ў 2012 годзе, нядаўна ж былі знішчаныя табліцы з назвай вуліцы Чырвонай Арміі ў Орлі.
Нагадаем, Беласточчына — гэта кампактнае месца пражывання беларускай нацыянальнай меншасці ў Польшчы. У гміне Орля большасць жыхароў дэкларуюць беларускую нацыянальнасць. У гміне беларуская мова мае статус дапаможнай мовы — гэта азначае, што муніцыпальныя чыноўнікі, якія працуюць з грамадзянамі, павінны яе ведаць і на ёй размаўляць, калі гэтага пажадае жыхар.
Паводле польскіх законаў, у гмінах і населеных пунктах, дзе нацменшасць складае 20% агулу жыхароў, дазваляецца ўводзіць мову нацменшасці ў якасці дапаможнай, а таксама ставіць двухмоўныя дарожныя ўказальнікі.
www.radyjo.net
Фота www.radio.bialystok.pl