Ілан Маск адключыў доступ да Starlink для амерыканскіх вайскоўцаў на Тайвані?
«SpaceX, верагодна, заблакавала паслугі шырокапалоснага доступу ў інтэрнэт на Тайвані і ваколіцах», — напісаў у лісце кангрэсмен Майк Галахер і патрабуе растлумачыць, чаму амерыканскія вайскоўцы на Тайвані страцілі доступ да Starlink.
Выява Midjourney для www.ixbt.com
Амерыканскія кангрэсмены заклікаюць заснавальніка SpaceX Ілана Маска даць амерыканскім вайскоўцам доступ да камунікацый Starlink на Тайвані, паведамляе «Голас Амерыкі».
Як піша Forbes, кангрэсмен-рэспубліканец Майк Галахер накіраваў Маску ліст з патрабаваннем да бізнесоўца растлумачыць, чаму амерыканскія вайскоўцы на Тайвані і вакол яго не маюць доступу да праграмы Starshield, якая, сярод іншага, забяспечвае амерыканскіх вайскоўцаў сродкамі сувязі Starlink.
Заканадаўца адзначыў, што ў гэтую праграму Міністэрства абароны ЗША ўклала дзясяткі мільёнаў долараў, і распрацоўвалася яна спецыяльна для вайскоўцаў.
У артыкуле Forbes таксама гаворыцца, што да такіх заклікаў да Ілана Маска датычная «група амерыканскіх заканадаўцаў».
А The Wall Street Journal паведамляе, што Камітэт Палаты прадстаўнікоў па Кітаю, які ўзначальвае Галахер, атрымаў інфармацыю з розных крыніц аб тым, што шырокапалосная спадарожнікавая сувязь, якая забяспечваецца праз праграму Starshield, не працуе ў Тайвані і побач з ім.
«SpaceX, верагодна, заблакіраваў паслугі шырокапалоснага доступу ў інтэрнэт у Тайвані і вакол яго. Магчыма, у парушэнне кантрактных абавязацельстваў SpaceX з урадам ЗША», — напісаў у лісце кангрэсмен Галахер, паведамляе The Wall Street Journal і Forbes, чые журналісты атрымалі доступ да ліста ад 24 лютага.
Глядзіце таксама
Кампанія SpaceX запусціла праграму Starshield у снежні 2022 года. Гэтая праграма прапануе абаронным і разведвальным службам спецыяльныя паслугі бяспечнай сувязі праз шырокапалосную спадарожнікавую сетку Starlink.
У верасні 2023 года Міністэрства абароны ЗША заключыла з SpaceX гадавы кантракт на выкарыстанне Starshield для амерыканскіх вайскоўцаў. Як паведамляў тады CNBC News, максімальны кошт гэтай здзелкі павінен быў скласці 70 мільёнаў долараў.
Па даных Forbes, Starshield у асноўным выкарыстоўваецца для забеспячэння доступу ў інтэрнэт у аддаленых месцах або месцах, пацярпелых ад стыхійных бедстваў або ваенных зон.
Кангрэсмен Галахер падкрэсліў у лісце, што «надзейная сетка сувязі для амерыканскіх вайскоўцаў на Тайвані і вакол яго мае першараднае значэнне для абароны інтарэсаў ЗША ў Інда-Ціхаакіянскім рэгіёне».
Без падлучэння да інтэрнэту, сказаў Галахер, «амерыканскі ваенны персанал у заходняй частцы Ціхага акіяна будзе падвяргацца сур'ёзнай рызыцы».
Глядзіце таксама
У адказ 26 лютага SpaceX абвясціла ў сетцы X, што не парушала ніякіх дзяржаўных кантрактаў: «SpaceX цалкам выконвае ўсе свае кантракты з урадам ЗША».
Кампанія заявіла, што паведаміла кангрэсменам, што іх дэзінфармавалі.
Forbes піша, што Ілан Маск у 2022 годзе вылучыў ідэю аб тым, што канфлікт паміж Кітаем і Тайванем можа быць спынены, калі Тайвань стане «асаблівай адміністрацыйнай зонай», падобнай да Ганконга.
Затым у адказ афіцыйныя асобы Тайваня нагадалі Маску, што астраўная дзяржава была незалежнай ад Кітая з часоў грамадзянскай вайны ў 1949 годзе.
Адметна, што нядаўна ўкраінская выведка заявіла, што Расія выкарыстоўвае спадарожнікі Starlink у зоне баявых дзеянняў ва Украіне. Маск на гэта заявіў, што такая ніфармацыя — «ілжывыя навіны». Зрэшты, амерыканскі бізнесовец так і не адказаў прама на пытанне, ці можа Расія выкарыстоўваць тэрміналы Starlink, набытыя праз пасярэднікаў.
Варта таксама дадаць, што SpaceX у мінулым годзе забараніла ўкраінскім вайскоўцам выкарыстоўваць Starlink для наступальных мэтаў, у тым ліку для кіравання беспілотнікамі.