Байдэн — пра сітуацыю ў Афганістане: Амерыканцы не будуць гінуць у вайне, якую самі афганцы не хочуць весці

Прэзідэнт ЗША заявіў, што ваенныя ЗША не павінны гінуць у вайне, якую ваенныя Афганістана самі адмовіліся весці. Пры гэтым ён прыгразіў імгненным адказам талібам у выпадку нападаў на амерыканцаў.

Прэзідэнт ЗША Джо Байдэн выступіў з заявай па сітуацыі ў Афганістане. Ён сказаў, што ўсё яшчэ лічыць слушным рашэнне аб вывадзе войск, але сітуацыя ў краіне разгортвалася больш імкліва, чым меркавалася, піша РБК.

Паводле яго слоў, палітычнае кіраўніцтва Афганістана здалося і збегла, а ваенныя адмовіліся змагацца з членамі «Талібана». Амерыканскія вайскоўцы не павінны гінуць у вайне, якую самі афганцы адмаўляюцца весці. Калі афганскія вайскоўцы не здольныя абараніць краіну, яшчэ год прысутнасці амерыканскай арміі нічога не зменіць, патлумачыў прэзідэнт ЗША.

«Я цалкам падтрымліваю сваё рашэнне [аб вывадзе вайскоўцаў з тэрыторыі Афганістана]. Праз 20 гадоў я на ўласным горкім вопыце пераканаўся, што ніколі не было адпаведнага часу для вываду войск ЗША», — растлумачыў прэзідэнт. Ён дадаў, што не будзе прасіць амерыканскіх салдат «бясконца змагацца ў грамадзянскай вайне іншай краіны».

Пры гэтым Байдэн паабяцаў вокамгненную рэакцыю ЗША, калі талібы нападуць на амерыканцаў. Таксама ён паабяцаў падтрымліваць народ Афганістана, у тым ліку ў адстойванні ім сваіх правоў.

Гэта першы выступ Байдэна з тых часоў, як «Талібан» заявіў аб поўным кантролі над Афганістанам і ўвайшоў у Кабул 15 жніўня. Вайскоўцы ЗША знаходзіліся ў краіне з 2001 года, яны ўвайшлі ў краіну пасля тэрактаў 11 верасня, адказнасць за якія ўзяла на сябе тэрарыстычная арганізацыя «Аль-Каіда». Рашэнне аб вывадзе войск Байдэн тлумачыў барацьбой з тэрарыстамі. «Мы адправіліся ў Афганістан па дзвюх прычынах: пакончыць з Бен Ладэнам, а таксама каб [Афганістан] перастаў быць сховішчам [для тэрарыстаў]. З самага пачатку я ніколі не думаў, што мы там, каб неяк аб'яднаць <...> Афганістан», — заяўляў ён у красавіку.

У сваім выступе ў панядзелак Байдэн у тым ліку растлумачыў, што ЗША выканалі свае задачы ў Афганістане па ліквідацыі пагрозы для сябе з боку тэрарыстаў. Паводле яго слоў, амерыканская прысутнасць больш не з'яўляецца цікавасцю ў галіне забеспячэння нацыянальнай бяспекі.

Талібы пачалі наступ у траўні, калі вывад войск ЗША перайшоў у актыўную фазу. У ліпені Вашынгтон паведаміў, што вывеў 90% прызначаных для гэтага вайскоўцаў. У пачатку жніўня «Талібан» узяў пад кантроль першую сталіцу правінцыі, а да сярэдзіны месяца дайшоў да Кабула.

На фоне прасоўвання талібаў ваеннае кіраўніцтва Афганістана, а таксама прэзідэнт Ашраф Гані пакінулі краіну.