«Размовы пра актуальнае» правялі са спартсменамі. А актуальнае ў нас — выбары

Рэжым так клапоціцца, каб усё прайшло гладка, што праводзіць гутаркі нават са спартсменамі.

25 лютага ў Беларусі пройдзе «адзiны дзень галасавання» — «выбары» адразу ў «парламент» Лукашэнкі i ў яго «саветы» розных узроўняў. Пры гэтым насамрэч, хто стане рэжымнымi «дэпутатамi», сiстэма распiсвае загадзя. Цяпер сiстэма з цяжкасцю намалявала нават бачнасць «канкурэнцыi» — калi ў «парламент» хаця б фармальна iдзе 2,4 чалавека на месца, то на рэгiянальным узроўнi паказчык склаў усяго 1,5 чалавека.

Але ж чынушы як могуць намагаюцца паказаць, што iх «галасаванне» нiбыта нешта вырашае. Даводзяць гэта традыцыйнымi метадамi — прымусовымi сустрэчамi з «працоўнымi калектывамi». Тычыцца гэта i белспорту, піша «Трыбуна». Не ўпершыню: напрыклад, два гады таму тузалi на «сходы» па зменах у рэжымную «канстытуцыю».

Спартыўныя функцыянеры ідуць у «дэпутаты». А хто ў канкурэнтах?

Цяпер жа «мерапрыемствы» прысвечаны «выбарам». У прыватнасцi, «размова пра актуальнае», як назвала гэта клубная прэс-служба «Тарпеда-БелАЗ», прайшла ў Жодзіне. Па фота з мерапрыемства цяжка западозрыць, што ў гульцоў гэтая гутарка выклікала шмат энтузіязму.

Галоўны трэнер каманды Дзмітрый Молаш, які заняў месца ў «кутку выбаршчыка», здаецца, таксама думаў пра нешта сваё.

Пра прадказальнасць «выбараў» у Жодзiне кажа просты факт: на 42 з 44 «участкаў» розных узроўняў ёсць роўна па двое «кандыдатаў», яшчэ на двух — па адным. Членам «парламента» Лукашэнкi там стане мясцовы ваенкам Юрый Марэцкi. На яго месца, як i на тры месцы ў «савеце дэпутатаў» Лукашэнкi па Мiнскай вобласцi, людзi з завода «БелАЗ» не прэтэндуюць. А вось на 40 месцаў у «савет» па Жодзiне прэтэндэнтаў з прадпрыемства шмат — на некаторых участках яны нават канкурыруюць паміж сабой.

Сярод iншых, iдуць у «дэпутаты» начальнiк упраўлення спартыўна-аздараўленчай працы Уладзiмiр Трацюк (ад прарэжымнай «Белай Русi») i яго намеснiк Сяргей Цюльманкоў. Таксама хоча ў «савет» галоўная па спорце ў выканкаме Лукашэнкi па Жодзiне Вольга Галабародава. А яшчэ ў вочы кiдаецца, што «партыя» вядомага лукашыста Алега Гайдукевiча (таго, у канале якога быў дзiкпiк) на адну з «акруг» вылучыла «кандыдата», якi ў 2003 годзе быў судзiмы за катаванне —атрымаў два гады папраўчых работ па нейкiх змякчальных акалічнасцях.

Яшчэ адна «сустрэча» адбылася ў Доме гандбола з гульцамі «СКА-Мінск» і «БДУФК-СКА». Там пра «выбары» расказвалі намесніца начальніка ўпраўлення спорту і турызму выканкама Лукашэнкі па Мінску Вольга Бараноўская і былы гандбалiст Андрэй Барбашынскі, якi ў 2020-ым быў «даверанай асобай» Лукашэнкi i працягвае падтрымлiваць дыктатара.

На сустрэчу нават выкацілі спецыяльны экран — відаць, толькі для таго, каб вывесці на яго адну карцінку. Гандбалiстаў жа пасадзiлi на трыбуну.

СКА сцвярджае, што ў аўдыторыi нават былi нейкiя пытаннi пра «галасаванне», на якiя адказваў Барбашынскi. Але ж у тэме «выбараў» намкiраўнiка БФГ пацярпеў няўдачу. Лукашыст вылучаўся ў «савет» Лукашэнкi па Гродзенскай вобласцi ў родных Ашмянах, дзе нават мясцовая ДЮСШ названа ў яго гонар. Але ж у сiстэмы ўсё распiсана, i, вiдавочна, гэтым разам Барбашынскi ў планы не ўваходзiў. У канчатковым спiсе кандыдатаў у Ашмянах адно прозвiшча — «камунiсткi» i супрацоўнiцы мясцовага выканкама Лукашэнкi Вольгi Барысенка-Рабко.

Дом гандбола знаходзiцца там, дзе ў «парламент» будзе «пераабiрацца» тыповая рэжымнiца Марына Лянчэўская — падтрымка «сiлавiкоў» i «пужалкi» пра Украiну ў камплекце. У «савет» Лукашэнкi па Мiнску на той тэрыторыi iдзе БРСМавец з «Белай Русi» Раман Бандарук. Таксама СКА гуляе ў дварцы спорту «Уручча» — на той тэрыторыi месца ў «парламенце» захавае аднадумец Лянчэўскай, рэжымны «генерал-маёр» запасу Iван Гардзейчык, а ў мiнскi «савет» пойдзе прэс-сакратарка МУС Лукашэнкi Наталля Сахарчук.

«Прынізіць, звольніць, паставіць свайго чалавека». У беларускім футболе спрабуюць падпарадкаваць трэнераў

Прайшла сустрэча i ў футбольным «Мінску». Там, праўда, абышліся без прыцягнення спартсменаў — слухаць пра «выбары» давялося іншым супрацоўнікам клуба.

Прыехалi выступаць туды начальнік упраўлення спорту і турызму выканкама Лукашэнкі па Мінску Максiм Варапай і старшыня Федэрацыі лёгкай атлетыкі Іван Ціхан — ён жа па сумяшчальнiцтве член вышэйшага палiтычнага савета «Белай Русi», там нават не надта намагалiся рабiць выгляд «роўнаснага падыходу».

База «Мiнска» месцiцца па суседстве з АБФФ — i па iх акрузе ў «парламент» iдзе старшыня федэрацыйнага Кантрольна-дысцыплiнарнага камiтэта Вадзiм Iпатаў. Дзеля гэтага ён сышоў з пасады намкiраўнiка ЦВК Лукашэнкi, на якой з 2010 года дапамагаў Лiдзii Ярмошынай з фальсiфiкацыямi розных «выбараў» (пасля яе сыходу захаваў пасаду, але ж «выбараў» з той пары дагэтуль не было). У мiнскi ж «савет» iдзе ад размешчанага недалёка РНПЦ спорту яго кiраўнiца, член «Белай Русi» i выканкама алiмпiйскага камiтэта Лукашэнкi Iрына Малёваная.

Пакуль не паведамлялася пра «сустрэчы» з валейбольнага і баскетбольнага «Мінскаў». Аднак на іх сайтах можна знайсці «эксклюзіўнае інтэрв’ю» кіраўніцы верхняй палаты «парламента» Лукашэнкi Наталлі Качанавай пра рэжымную iнтэграцыю з Расiяй.