У Вярхоўнай Радзе Украіны запатрабавалі ад уладаў Кіева аднавіць мемарыял загінулым беларусам

Дэпутаты Вярхоўнай Рады назвалі частковы дэмантаж мемарыялу загінулым беларусам «рэзананснай і шакавальнай падзеяй»

Група дэпутатаў Вярхоўнай Рады Украіны звярнулася да кіеўскіх уладаў і ў Міністэрства адукацыі Украіны з патрабаваннем умяшацца ў сітуацыю вакол мемарыяльнага знаку беларусам, якія загінулі ва Украіне з 2014 года, піша Свабода.

«Просім вас неадкладна ўмяшацца ў сітуацыю, спыніць знішчэнне мемарыяльнай дошкі, якая ўшаноўвае памяць беларусаў, якія аддалі жыццё ў барацьбе за Украіну. Забяспечыць поўнае аднаўленне мемарыяльнай дошкі і не дапусціць у будучыні актаў вандалізму ў дачыненні да помніка з боку адміністрацыі ўніверсітэту», — адзначаецца ў дэпутацкім звароце, які мае ў сваім распараджэнні Свабода.

Прадстаўнікі Вярхоўнай Рады Украіны падкрэслілі, што помнік усталяваны на сродкі сяброў і блізкіх загінулых, а Кіеўскі саюз ветэранаў Антытэрарыстычнай аперацыі дапамагаў прайсці ўсе інстанцыі — ад Кіеўскай гарадской дзяржаўнай адміністрацыі да раённай рады і ўласнікаў будынку, каб атрымаць усе дазволы на ўсталяванне помніка.

Як стала вядома Свабодзе, кіраўніцтва каледжу, на сцяне якога знаходзіцца мемарыял, перамясціла знятыя герб «Пагоня» і надпісы «Жыве Беларусь!» і «Слава Украіне!» у падвал навучальнай установы.

Анжэла Душаева, прадстаўніца дабрачыннага фонду «Валошка», паведаміла Свабодзе, што пасля іхнага наведвання каледжу ягонае кіраўніцтва вырашыла вярнуць на месца надпіс «Слава Украіне!». Беларускі нацыянальны і ўкраінскі дзяржаўны сцягі пакуль на мемарыяле адсутнічаюць.

Ініцыятары стварэння мемарыялу звярнуліся ў Службу бяспекі Украіны і паліцыю з патрабаваннем разабрацца з дзеяннямі кіраўніцтва каледжу і Кіеўскага нацыянальнага ўніверсітэту тэхналогій і дызайну.

1 кастрычніка стала вядома, што ў Кіеве пашкодзілі памятны знак беларусам, якія загінулі за Украіну, адкрыты ў 2016 годзе на вуліцы Беларускай: з помніка зніклі надпісы «Слава Украіне», «Жыве Беларусь», герб «Пагоня» ды нацыянальныя сцягі Беларусі і Украіны.

Мемарыял, які ўрачыста адкрылі ў сакавіку 2016 году, ушаноўвае памяць Міхася Жызнеўскага, які загінуў у 2014 годзе падчас «Рэвалюцыі годнасці», а таксама тых беларусаў, якія загінулі падчас баявых дзеянняў.

Яшчэ да маштабнага ўварвання расійскіх войскаў ва Украіну 24 лютага 2022 году, у баях на ўсходзе Украіны загінулі 10 ураджэнцаў Беларусі — яны ваявалі ў складзе добраахвотніцкіх батальёнаў і ва ўкраінскіх Узброеных сілах.