У Менску адбываецца «Кангрэс патрыятычных сілаў» – хто прыехаў?

Пакуль мы з вамі думаем як вызваліць Беларусь, у сталіцы нашай краіны адбываецца цэлы Кангрэс, у якім бяруць удзел пралукашэнкаўскія дзеячы, акрамя гэтага – эўрапейскія і нават украінскія прадстаўнікі. Прысутнасьць віцэ-сьпікера сэрбскага парлямэнту, здаецца, не нясе нічога добрага для Андрэя Гнёта. Што там адбываецца?

Ішла вайна народная

Як ні саромеюцца арганізатары, стартавала імпрэза з паказу кадраў хронікі Вялікай Айчыннай (кадраў Другой Сусьветнай напэўна не паказвалі, напрыклад тыя кадры, дзе ў 1939 годзе ў Берасьці нацысты і камуністы праводзілі сумесны парад пасьля сумеснага захопу польскай тэрыторыі), каб наглядна прадэманстраваць прысутным: «Беларусь добра памятае, што такое вайна, і сёньня наша галоўная мэта — не дапусьціць паўтарэньня тых страшэнных падзеяў. Нашую краіну і суседнія дзяржавы наўмысна правакуюць на ваенны канфлікт. Амэрыканцам не патрэбная моцная Эўропа, таму яны спрабуюць акунуць нас у хаос»,  — сказаў Але Гайдукевіч, старшыня Лібэральна-дэмакратычнай партыі Беларусі. «Наша мэта — паказаць эўрапейскім партнэрам, што мы ня хочам вайны».

Тамада сьмешны і конкурсы цікавыя.

Арганізатарам гэтага форуму выступіў Алег Гайдукевіч, ужо ў другім пакаленьні спарынг-партнэр Лукашэнкі, які некалі служыў у сталічным РАУС, а сёньня ажно так званы віцэ-сьпікер так званай палаты прадстаўнікоў.

«У нас сёньня знаходзяцца ў гэтай залі прадстаўнікі Сэрбіі, Славаччыны, Балгарыі, Польшчы, нашыя сябры з Нямеччыны, Аўстрыі, Украіны, Расеі. І ўсім ім мы хочам заявіць: мы ведаем, што такое вайна. Міт аб ізаляцыі Беларусі праваліўся даўно. Мы ўжо бачым, Кітай, Блізкі Ўсход, візіты прэзідэнта, адносіны з многімі краінамі сьвету. Але сёньня мы паказваем, што Эўропа з намі. Мэта кангрэса — за мір і разьвіцьцё. Мы сёньня раскажам гэтым людзям, якія прыехалі з Эўропы, што мы нікому не пагражаем, што гэта Эўропу хочуць увесьці ў хаос вайны».  

Сэрбскія матывы

Як паведамляюць пралукашэнкаўскія каналы, «у Палаце прадстаўнікоў праходзіць сустрэча намесьніка Старшыні Палаты прадстаўнікоў Нацыянальнага сходу Рэспублікі Беларусь Вадзіма Іпатава з віцэ-сьпікерам Парлямэнту Рэспублікі Сэрбія Ёванам Янічам. Сустрэча праходзіць у рамках Кангрэса патрыятычных сілаў "За мір і разьвіцьцё" па запрашэньні Лібэральна-дэмакратычнай партыі Беларусі, прымеркаванага да 80-годзьдзя вызваленьня Рэспублікі Беларусь ад нямецка-фашысцкіх захопнікаў».

Нагадаем, фактычна толькі наўпроставае рашэньне міністра юстыцыі Сэрбіі можа выратаваць беларускага актывіста Андрэя Гнёта ад экстрадыцыі ў лукашэнкаўскія засьценкі.

Адзін з кіраўнікоў Сэрбіі прысутнічае на «зьлёце недабітых» у Менску, і можна толькі дзякаваць Богу, што ён з сабою не прывез патэнцыйную ахвяру антынароднага рэжыму ў Беларусі.

Хто такі Ёван Яніч? Ён прадстаўнік папулісцкай партыі «Мы – голас народа». У сэрбскім парлямэнце на выбарах 2023 года яны атрымалі 6 з 250 месцаў.

У 2024 годзе гэты дзеяч быў у Расеі, дзе заявіў:

Кіраўнік польскай партыі

Сярод прысутных быў Кшыштаф Талвінскі, старшыня польскай партыі «Фронт». Ён заявіў:

«Бясьпека ў Эўропе павінна абапірацца на сучасную Расею. Ніхто ня можа быць выключаны, каб мы, эўрапейцы, маглі перажыць гэтыя цяжкія перыяды, нам неабходна такое супрацоўніцтва, як сёньня тут, у Менску, патрыятычных сілаў, якія маюць сьмеласьць сказаць, што такая палітыка, якую мы праводзім, так званая англасаксонская, разбуральная, згубная для Эўропы».

Цікава, ці сустракаўся паляк са сваім калегам, шпіёнам і былым судзьдзёй Томашам Шмідтам, і ці паказалі яму, дзе павесіўся нядаўна ўцякач зь яго краіны Чэчка?

А хто ўвогуле гэты Талвінскі? Гэта фэрмер, які ўжо прынамсі трэці год прыязджае на лукашэнкаўскія імпрэзы і прамаўляе ад імя «сапраўдных палякаў і непрадажнага Захаду». Па факце – гэта маргінальная асоба, чыя ў 2023 годзе створаная партыя не маю аніякага ўплыву ў польскім грамадзтве, што пацьвярджаецца любымі выбарамі, дзе прадстаўнікі Талвінскага імкнуліся прыняць удзел.

Гэтая групоўка мае яскрава прарасейскую арыентацыю (і верагодна фінансаваньне) і заклікала спыніць пастаўкі зброі ўкраінцам і «падтрымліваць выпрацаваныя пасьля 1945 года гарантыі бясьпекі мяжы і сяброўскую палітыку з Расейскай Федэрацыяй».

Галоўны «патрыёт» Беларусі Гайдукевіч працягвае: «Вы прыехалі ў Менск, і заўтра ў вас скажуць, што вы прабеларускія і прарасейскія. А гэта не так, вы пранацыянальныя! І мы хочам, каб і ў вас патрыёты былі ва ўладзе! І каб Эўропа стала незалежнай і моцнай».

Ад каго незалежнай – няхай застанецца таямніцай так званага палітыка.

Апроч таго ў межах гэтага мерапрыемства ў так званай Палаце прадстаўнікоў Беларусі прайшлі сустрэчы старшыні Пастаяннай камісіі Палаты прадстаўнікоў па міжнародных справах Сяргея Рачкова з парлямэнтарыямі Балгарыі і Славаччыны. Таксама плянуецца афіцыйнае ўручэньне пасланьняў ад кіраўніцтва сэрбскага, балгарскага і славацкага парляментаў, адрасаваных кіраўніцтву беларускай палаткі, якая з 1996 года зьяўляецца падкідышам беларускага парлямэнтарызму.

Гайдукевіч і сябры лічаць, што «Кангрэс патрыятычных сілаў з гэтага часу стане штогадовым. Чакаецца, што ў 2025-м да мерапрыемства далучыцца дэлегацыя з Францыі».

Раскапаюць напэўна якога паўжывога камуніста з Тулузы.

О, дзівосны, новы сьвет.