Туск: Затрыманы беларус, які працаваў на расійцаў і замовіў забойства паплечніка Навальнага
Таксама ў Польшчы затрыманы патэнцыйны забойца прэзідэнта Зяленскага.
Дональд Туск (Фота: Francois Lenoir / Reuters)
18 красавіка Нацыянальная пракуратура Польшчы паведаміла аб затрыманні чалавека, які падазраецца ў гатоўнасьці дзейнічаць на карысьць спецслужбаў РФ. Грамадзяніну Польшчы Паўлу К. прад'яўлена абвінавачаньне.
«У яго задачы ўваходзіў збор і перадача вайсковай выведцы Расійскай Федэрацыі інфармацыі аб бяспецы аэрапорту Жэшаў-Ясёнка.
Гэта павінна было, у тым ліку, дапамагчы расійскім спецслужбам спланаваць магчымы замах на кіраўніка замежнай дзяржавы — прэзідэнта Украіны Уладзіміра Зяленскага», — паведаміла пракуратура.
Сёння, 19 красавіка, у Польшчы затрымалі двух падазраваных у нападзе на расійскага апазіцыянера Леаніда Волкава, паплечніка Аляксея Навальнага, паведаміла Цэнтральнае следчае бюро.
Невядомыя напалі на Леаніда Волкава 12 сакавіка каля ягонага дома ў Вільні. Волкаву ў вочы распылілі газ і білі яго малатком, перад гэтым разбіўшы шкло ў яго аўтамабілі.
Затрыманыя з'яўляюцца грамадзянамі Польшчы, паведаміў прэм'ер-міністр Дональд Туск.
Леанід Волкаў пасля нападу ў Вільні. Фота Івана Жданава
«Патэнцыйны забойца прэзыдэнта Зяленскага, паляк, які дзейнічаў у супрацоўніцтве з расійскімі службамі, быў арыштаваны 2 дні таму.
Затрыманы беларус, які працаваў на расійцаў і замовіў двум палякам забойства паплечніка Навальнага», — напісаў кіраўнік урада.
Глядзіце таксама
Непасрэдныя выканаўцы злачынства таксама знаходзяцца пад вартай. Паводле Туска, яны звязаныя з коламі фанатаў «Ультрас» (арганізаваныя групы спартовых заўзятараў).
«Ніякай паблажлівасці для супрацоўнікаў расійскіх службаў не будзе», — падкрэсліў Туск.
«Усякую здраду і спробу дэстабілізацыі мы будзем выпальваць жалезам», — заявіў прэм'ер-міністр.
Прэзідэнт Літвы Гітанас Наўседа абмеркаваў затрыманне з прэзідэнтам Польшчы Анджэем Дудай. Паводле яго слоў, затрыманых хутка перададуць уладам Літвы.