Першамай у Мінску (фотарэпартаж анлайн, +відэа)

Сёння ў Мінску, як і ў іншых гарадах Беларусі адбываюцца акцыі пратэсту. Беларускі нацыянальны кангрэс заклікаў правесці акцыю пратэсту 1 траўня а 14-й гадзіне на Кастрычніцкай плошчы.

13.50. На Кастрычніцкай пачынаюць збірацца людзі. Прыйшла Марына Адамовіч. Нагадаем напярэдадні Мікола Статкевіч быў арыштаваны на 5 сутак.

14.00. " Людзі не спадзяюцца на ўладу, спадзяюцца толькі на сябе, — кажа лідар Руху "За Свабоду" Юрась Губарэвіч. Ён прагназуе рост пратэстаў восенню. Кажа пра запалохвання і затрыманні актывістаў ў Мінску і рэгіёнах. "Калі пратэсты выбухнуць, у уладаў не хопіць турмаў", — кажа Губарэвіч.

На акцыю прыйшлі Уладзімір Някляеў і Валер Шчукін. Людзі пачынаюць збірацца.
Адзін з удзельнікаў акцыі дэманструе прысутным чысты аркуш паперы. Кажа, што не трэба нічога на ім пісаць, усім і так зразумела, што адбываецца ў краіне.

14.10. Міліцыя заклікае разыходзіцца, папярэджвае пра прымяненні спецсродкаў.
Але людзі не звяртаюць увагу. Прыйшлі Ніна Багіснкая і Мікола Савіцкі.

Прафесар Мікола Савіцкі прачытаў верш: "Мы выйдзем шчыльнымі радамі...". Прысутныя адгукнуліся апладысментамі.

14.20. Павал Севярынец скандуе: "Салідарнасць!", "Жыве Беларусь!". Людзі падхопліваюць яго словы.

На плошчы сабралося шмат людзей. Лідары занялі прыступкі Палаца Рэспублікі. Пачаўся мітынг.

14.25. Уладзімір Някляеў падзякаваў усім, хто прыйшоў. Заклікаў да салідарнасці і абвясціў аб пачатку мітынгу. Ён нагадаў пра чарговае выкраданне Міколы Статкевіча. Таксама слова на мітынгу далі Марыне Адамовіч.

14.30. Марына Адамовіч кажа: "Нас не напалохаць. Сёння свята салідарнасці!" Яна заклікала да салідарнасці з арыштаванымі патрыётамі. Таксама патрабванне вызваліць усіх патрыётаў выказаў Павел Севярынец. Людзі скандуюць: "Адстаўка!" "Свабода!"

Вячаслаў Сіўчык агучвае патрабаванне свабоды ўсім палітвязням.

14.35. На мітынг у Мінск прыехала і актывістка з Брэста Наталля Папкова. Пасля прамоў Яўген Афнагель заклікаў прысутных ісці да плошчы Незалежнасці. Людзі пагадзіліся. Некалікі сот чалавек рушаць убок плошчы Незалежнасці.

За людзьмі рушылі і аўтазакі.

14.45. Мінакі падтрымліваюць удзельнікаў акцыі апладысментамі.

Максім Вінярскі запаліў фаер.

14.50. Калона прайшла ГУМ і рушыла далей.

Праходзячы каля будынку КДБ, калона пачала сканадаваць: "Далоў КДБ!"

14.55 Удзельнікі акцыі паступова набліжаюцца да плошчы Незалежнасці. Іх суправаджаюць аўтазакі і пяць мікрааўтобусаў без нумароў.

15.00. Калона выйшла на плошчу Незалежнасці.

15.05. Ля Чырвонага Касцёла пачынаецца мітынг.

Ідзе галасаванне за рэзалюцыю. У рэзалюцыі прагучалі як традыцыйныя патрабаванні: адмена дэкрэту і свабодныя выбары, свабоду палітвязням, так і агучана патрабаванне адмены сумесных беларуска-расійскіх вучэнняў.

15.10 Акцыя скончылася. Людзі пачынаюць разыходзіцца. Пакуль затрыманых няма.