Меркель анансуе новыя санкцыі ў дачыненні да ўладаў Беларусі ў выпадку парушэння правоў грамадзян

Канцлер ФРГ зноў падкрэсліла, што Германія і Еўрасаюз не прызнаюць вынікі прэзідэнцкіх выбараў, якія прайшлі ў жніўні 2020 года.

Германія і ЕЗ і надалей будуць прыцягваць да адказнасці вінаватых у парушэнні правоў чалавека ў Беларусі, як яны гэта ўжо прадэманстравалі прыняццем трох санкцыйных пакетаў. Аб гэтым заявіла канцлер ФРГ Ангела Меркель у сваім штотыднёвым падкасьце, размешчаным у суботу на сайце федэральнага ўрада, піша ТАСС.

«Германія і Еўрапейскі Саюз і надалей будуць заклікаць да адказу вінаватых у бесперапынных парушэннях правоў чалавека ў Беларусі, як мы гэта ўжо зрабілі прыняццем санкцый ЕЗ», — сказала яна. Меркель зноў падкрэсліла, што ФРГ і Еўрасаюз не прызнаюць вынікі прэзідэнцкіх выбараў, якія прайшлі ў жніўні 2020 года.

«Германія і ЕС не прызнаюць іх, паколькі гэта не былі дэмакратычныя выбары», — дадала яна. Па сцвярджэнні канцлера, яны не былі «ні свабоднымі, ні сумленнымі, ні празрыстымі».

Меркель выказала салідарнасць з удзельнікамі акцый пратэсту, якія, на яе думку, выходзяць на дэманстрацыі «супраць фальсіфікацыі вынікаў выбараў, за палітычныя змены і глыбокія пераўтварэнні ў іх краіне». «Аднак дзяржаўнае кіраўніцтва на чале з Аляксандрам Лукашэнкам ведае толькі адзін адказ на мірныя дэманстрацыі — гвалт. Разлік уладаў, як здаецца, заключаецца ў надзеі, што свет хутка зноў забудзе гэтых адважных людзей. Мы не павінны гэтага ні ў якім разе дапусціць», — сцвярджала канцлер.

«Мы заклікаем палітычнае кіраўніцтва ў Мінску неадкладна спыніць рэпрэсіі і вызваліць палітычных зняволеных. Мы заклікаем паважаць, нарэшце, права грамадзян на свабоду меркаванняў», — працягвае Меркель. Яна нагадала, што Германія прыняла план падтрымкі грамадзянскай супольнасці Беларусі, у рамках якога спрашчаюцца правілы атрымання віз для прыхільнікаў перамен. Ён таксама прадугледжвае стыпендыі і падтрымку незалежных СМІ, падкрэсліла канцлер.

«Гэта не вырашыць канфлікту паміж законнасцю і прыгнётам у Беларусі. Звонку гэта наогул немагчыма», — прызнала Мэркель. «Але гэта паказвае адважным людзям там, што мы падтрымліваем і чуем іх голас», — падагульніла яна.

Еўрасаюз ужо увёў тры пакеты санкцый супраць Мінска, меры закранулі 84 прадстаўнікоў кіраўніцтва краіны, у тым ліку Аляксандра Лукашэнку і прадстаўнікоў сілавых структур. Усім ім забаронены ўезд у ЕС, іх рахункі ў еўрапейскіх банках, калі будуць выяўленыя, падлягаюць замарозцы. Санкцыі таксама ўведзеныя супраць 7 юрыдычных асоб, уключаючы Кіраўніцтва справамі прэзідэнта Беларусі, Мінскі завод колавых цягачоў, ААТ «140 рамонтны завод», кампаніі «Белтэхэкспарт», «Сінезіс» і Dana holdings.