Крэмль занепакоены і папярэджвае: сітуацыя з мігрантамі не павінна пагражаць Расіі

Крэмль занепакоены сітуацыяй з мігрантамі на беларуска-польскай мяжы і спадзяецца, што яна не стане пагрозай для Расіі. Пра гэта заявіў прэс-сакратар Уладзіміра Пуціна Дзмітрый Пяскоў.

«Мы спадзяемся, што ніякім чынам гэта не прыме формы, якія будуць з'яўляцца пагрозай для нашай бяспекі», — цытуе Пяскова REFORM.by са спасылкай на ТАСС.

Пяскоў сцвярджае, што Расія ўважліва сочыць за сітуацыяй на мяжы і заклікае бакі да адказных паводзінаў. Па словах Пяскова, Масква і Мінск абмяркоўваюць пытанне па ўсіх магчымых каналах, у тым ліку па лініі спецслужбаў.

«Але яшчэ раз паўтараю — гэта праблема, рэальная праблема, якая тычыцца ў дадзеным выпадку Беларусі і Польшчы», — заявіў афіцыйны прадстаўнік Крамля.

Нагадаем, 8 лістапада вялікая калона мігрантаў вылучылася да пункта пропуску «Брузгі» на беларуска-польскай мяжы. Не дайшоўшы да пункта пропуску, мігранты збочылі (па іншых даных, іх выціснулі беларускія сілавікі) у лес. Было прадпрынята некалькі спроб прарвацца праз агароджу на тэрыторыю Польшчы. Мігранты разбілі лагер ля самай мяжы.