«Адчуў велізарнае пачуццё гонару». Што кажа прапаганда на ТБ пра ўдзел Лукашэнкі ў бунце Прыгожына
Журналісты паглядзелі выніковыя эфіры тэлеканалаў «Беларусь-1», АНТ і СТВ і прааналізавалі, як прапагандысты апісвалі ролю свайго працадаўцы ў падзеях падчас маршу Прыгожына.
Выданне «Zerkalo» сабрала, што гаварылі пра Лукашэнку і Прыгожына ў выніковых эфірах дзяржаўных тэлеканалаў Беларусі 25 чэрвеня.
«Беларусь-1»: «Гэта найвышэйшы пілятаж»
У «Галоўным этэры» на тэлеканале «Беларусь-1» вядоўца Сяргей Гусачэнка заявіў у самым пачатку, што Лукашэнка «зноў прадэманстраваў усяму сьвету, што любыя дамоўленасьці, чаго б яны ні каштавалі, лепшыя за гарматы, якія страляюць, і гібель людзей». Потым паказалі васьміхвілінны сюжэт аўтарства Лізаветы Казаковай. Яна сьцісла пераказала падзеі ў Расеі, перайшоўшы да паведамленьня прэс-службы Лукашэнкі, што «Прыгожын прыняў прапанову беларускага лідэра».
Затым выступілі прапагандысты, сярод якіх больш за ўсё Лукашэнку хваліў расейскі тэлевядоўца Ўладзімер Салаўёў:
«Гэта найвышэйшы пілятаж. Мы ня ведаем усіх нюансаў, дэталяў... Думаю, кнігі будуць напісаныя і фільмы зьнятыя».
АНТ: «Беларусь і Расея спаяныя адным лёсам»
Тэме мяцяжу і таго, як Лукашэнка ўмяшаўся ў сытуацыю, на АНТ прысьвяцілі амаль восем хвілінаў. Рэпартаж рабіў Ігар Тур, які ўваходзіць у пул Лукашэнкі:
«Выдыхнула нават не краіна, а цэлы сьвет, дзякуючы перамоўнай ініцыятыве Аляксандра Лукашэнкі, аб чым пазьней заявіў прэс-сакратар расейскага лідэра Дзьмітры Пяскоў».
Далей была зноў пахвала і заява Уладзімера Салаўёва, што Лукашэнка «сапраўды варты званьня героя Расеі». Дэпутат Андрэй Савіных дадаў, што Беларусь і Расея «спаяныя адным лёсам».
СТБ: «Адчуў велізарнае пачуцьцё гонару»
У выніковай перадачы СТБ цэнтральнае месца заняў сюжэт Яўгена Пуставога. У якасьці экспэрта ацэнкі ролі Лукашэнкі выступіў кіраўнік Нацыянальнай бібліятэкі Вадзім Гігін:
«Лукашэнка карыстаецца вялікай павагай у самых розных палітычных сілаў у Расейскай Фэдэрацыі. Так, Расея пазьбегла самага страшнага — яна пазьбегла смуты. І тое, што Беларусь, асабіста беларускі прэзыдэнт, у дадзеным выпадку выступіў як гарант, як чалавек, зацікаўлены ў захаваньні стабільнай, моцнай Расеі — гэта вельмі важна».
Зьявіўся на СТБ і камэнтар ад дэпутата Алега Гайдукевіча.
«Лукашэнка яшчэ раз паказаў, што ён чалавек, здольны дзейнічаць тады, калі гэта патрэбна. І, шчыра кажучы, учора я адчуў велізарнае пачуцьцё гонару», — заявіў старшыня Лібэральна-дэмакратычнай партыі.
Па словах Пуставога, «цяпер афіцыйны Менск становіцца міратворцам славянскай цывілізацыі»:
«Захаваны сотні, а можа, і тысячы жыцьцяў нашых рускіх людзей. Тэрытарыяльная цэласнасьць і грамадзкая згода вялікай Расеі».