100 гадоў кінастудыі Metro-Goldwyn-Mayer. Адным з яе стваральнікаў быў ураджэнец Менску!

Легендарны лягатып рыкаючага льва і вечны дэвіз «Ars Gratia Artis» (Мастацтва дзеля мастацтва) ведае кожны. Гэтая кінастудыя доўгі час была лідарам Галівуду дзякуючы габрэю, які раней жыў у Менску. Зазірнем у Залаты век кіно!

Трыюмвірат

Тры чалавекі, якія хоць і адрозьніваліся сваім удзелам і ўплывам, разам стварылі кінематаграфічную імпэрыю, якая стала сінонімам залатога веку Галівуду. Іх імёны — Маркус Лоў, Сэмюэл Голдвін і Луіс Б. Майер.

Ідэя прыйшла першаму зь іх. Маркус Лоў у 1920-х гадах назапасіў ужо шырокую сетку вадэвіляў і кінатэатраў па ўсёй тэрыторыі Злучаных Штатаў, але яму патрэбны быў бесперапынная плынь фільмаў, каб забясьпечыць прыбытковасьць сваёй імпэрыі забаваў. Ён прыйшоў да стратэгічнага рашэньня: аб'яднаць Metro Pictures, Goldwyn Pictures і Louis B. Mayer Productions у адну арганізацыю.

Рашэньне аб'яднаць гэтыя кампаніі падштурхнула яго выключнае прадбачаньне разьвіцьця кінаіндустрыі, дзе вытворчасьць і распаўсюд былі неразрыўна зьвязаныя.

Сэмюэл Голдвін, чыё імя дало сярэднюю літару ў MGM, па іроніі лёсу меў найменшае дачыненьне да кампаніі сярод яе заснавальнікаў. Да таго часу, калі Metro-Goldwyn-Mayer была афіцыйна створаная, Голдвін ужо быў выцеснены з Goldwyn Pictures, той кампаніі, якую ён дапамагаў стварыць. Нягледзячы на ​​гэта, яго імя засталося ў новаствораным брэндзе. Голдвін быў прадусарам з выдатнай рэпутацыяй.

Луіс Б. Майер, якога часта лічаць сапраўдным архітэктарам посьпеху MGM, быў геніем. Яго стыль кіраваньня вызначаў кампанію на працягу многіх дзесяцігоддзяў. Уплыў Майера выходзіў за межы адміністраваньня. Ён быў майстрам у стварэньні іміджу студыі.

Пад яго кіраўніцтвам MGM стала вядомая як «Ціфані сярод студыяў» (алюзія да знакамітага вытворцы каштоўнасьцяў – Tiffany). Яны сталі сінонімам глямура і кінематаграфічнай дасканаласьці. Майер валодаў дзіўнай здольнасьцю выяўляць і разьвіваць таленты, ён пераўтвараў актораў у суперзорак, у тым ліку Джудзі Гарлэнд, Кларка Гейбла і Грэту Гарба.

Яго формула была простай: ствараць якасныя фільмы, якія падабаюцца амэрыканскай публіцы, і сачыць за тым, каб яго зоркі зьзялі ў кінашэдэўрах.

Менавіта Луіс Майер нарадзіўся ў Менску ў 1884 годзе, паводле яго ўспамінаў. Зрэшты некаторыя дасьледчыкі мяркуюць што ў Менску ён стаў жыць неўзабаве пасьля нараджэньня, якое адбылося ва ўкраінскай частцы Палесься. Так ці інакш, гонар і славу габрэйскі хлопчык здабыў па іншы бок акіяну.

Такім чынам Маркус Лоў забясьпечыў камерцыйную стратэгію, Сэмюэл Голдвін пазычыў сваё імя і сваю спадчыну якасьці вытворчасьці, а Луіс Б. Майер напоўніў студыю мастацкім бачаньнем. Разам яны пабудавалі імпэрыю.

Залаты век Галівуду

Рост значнасьці MGM у 1920-х і 1930-х гадах быў неад’емна зьвязаны з адданасьцю глямуру і амаль беспрэцэдэнтнымі інвэстыцыямі ў якасьць вытворчасьці. Ад раскошных дэкарацыяў да фантастычных строяў, кожны фільм MGM быў створаны, каб быць прыкладам візуальнага хараства. Лёзунг студыі «больш зорак, чым на нябёсах» быў не пустымі словамі. Гэта зьяўлялася дакладным адлюстраваньнем таго, што існавала вакол.

Фільмаграфія студыі падобная на пераклічку самых значных скарбаў кінематографу. Чаго вартая прынамсі экранізацыя «Зьнесеных ветрам» 1939 года.

Нядаўна мы пісалі пра яго ў чарговым выпуску «Топ-10 фільмаў»:

«Легенда сусьветнага кіно, найлепшы фільм года на «Оскары», стужка, разабраная на цытаты. Па сутнасьці, гэта гісторыя каханьня, страты і выжываньня, у цэнтры якой — нязломная Скарлет А'Хара, якую ўвасобіла цудоўная Віўен Лі. Рамантызацыя Старога Поўдня ў фільме разам з праслаўленьнем рабства (на думку цэлага шэрагу гісторыкаў, крытыкаў і звычайных людзей) выклікала значныя дыскусіі на працягу многіх гадоў.

Сёньня, на жаль, можна са смуткам назіраць як у некаторых стрымінгавых плятформах перад гэтым шэдэўрам ідзе застаўка, у якой гаворыцца аб “памылковасьці паказу чорных і аднабокасьці паказу некаторых гістарычных аспектаў”. З сучасных людзей спрабуюць зрабіць недалёкіх ці малаадукаваных, таму тыкаюць іх паперкай: «Там дрэнна, асьцярожна»!

Спадзяюся, кожны чалавек мае здольнасьць самастойна ацаніць твор мастацтва».

Metro-Goldwyn-Mayer адыграла ключавую ролю ў фармаваньні студыйнай сістэмы. Гэтая эпоха характарызавалася некалькімі буйнымі студыямі, якія кантралявалі вытворчасьць, распаўсюд і паказ фільмаў. У гэтыя залатыя гады MGM вызначала культурны парадак дня для Амэрыкі і сьвету. Іх фільмы былі падзеямі.

Топ-10 фільмаў Грэты Гарба, ракавой жанчыны сусветнага кіно

Тэхнічныя інавацыі

На працягу ўсёй сваёй гісторыі MGM пасьлядоўна пашырала межы таго, чаго можна было дасягнуць у кінавытворчасьці. Яны зрабілі прагрэс у гуку, колеры і візуальных эфектах, якія ў сваю чаргу ўсталявалі новыя стандарты кіно.

Укараненьне гуку ў фільмах стала пераломным момантам для ўсёй індустрыі, і Metro-Goldwyn-Mayer хутка прыняла і ўдасканаліла гэтую новую тэхналёгію. «Брадвэйская мэлёдыя» ў 1929 годзе была першым у Галівудзе мюзіклам, у якім усё размаўлялі, сьпявалі і танчылі з гукам, і яна стала калясальным гітом, які задаў шаблён для будучых мюзіклаў.

Колер таксама быў месцам, дзе MGM паказваў прыклад. Раньнія інвэстыцыі студыі ў тэхналёгію Technicolor прынеслі плён у такіх шэдэўрах, як «Чараўнік краіны Оз» і «Зьнесеныя ветрам», абодва з 1939 года. Гэтыя фільмы прадэманстравалі, як можна выкарыстоўваць колер для паляпшэньня відовішча.

Да сёньняшняга дня фільмы вытворчасьці гэтай студыі 12 разоў перамаглі ў намінацыі Лепшы фільм на Оскары. А агулам студыя атрымала 182 узнагароды кінаакадэміі.

Скажыце, у вас таксама дрыжыкі, і прадчуваньне добрага кіно, калі напачатку рыкае легендарны леў з Metro-Goldwyn-Mayer.