Ужо і шыльды замянілі. «МакДональдс» афіцыйна пераўтварыўся ў «Mak.by» (фота)

Былы «МакДональдс», які так і не стаў «Смачна — і кропка», усё ж змяніў назву. Новай назвай былой амерыканскай франшызы стала «МАК.by». Пра гэта паведамляе фуд-блогер «Мярзотны Какабай».

«Гістарычны момант: Мы адкрыты — цяпер афіцыйна «Мак.by», сайт таксама памяняў імя на Mak.by!» — напісаў фуд-блогер.

У якасці доказу ён апублікаваў фота работ па змене шыльды ў рэстаране на месцы былога «МакДональдс» на мінскім праспекце Незалежнасці.

Як паведамлялася раней, заяўку на рэгістрацыю таварнага знака «МАК.by» ў пачатку красавіка падало «КСБ Віктары рэстараны». Яна размешчана ў базе даных Нацыянальнага цэнтра інтэлектуальнай уласнасці.

Раней назву «Мак.by» згадваў Аляксандр Лукашэнка, нагадвае «Л*стэрка». Выступаючы 31 сакавіка з пасланнем народу Беларусі, ён паскардзіўся, што яму даводзіцца займацца няпрофільнымі пытаннямі.

— Вы ведаеце, калі я пачынаю распыляцца вось па гэтым пытанні, калі прэзідэнту трэба ўмешвацца і вучыць то таму, то гэтаму, то яшчэ там «МакДональдс» нейкі перарабляць у «Мак.by» ці яшчэ ў нешта — у мяне кроў закіпае! Вы ж хочаце быць суверэннымі, незалежнымі. Як жа вы будзеце суверэннымі і незалежнымі, калі вы не бачыце, што дзеецца ў вас пад нагамі? — разышоўся Лукашэнка.

Раніцай у Мінску адкрыўся не «McDonald's», а невядома што

Як стала вядома 11 лістапада мінулага года, «МакДональдс» сыходзіць з беларускага рынку. Было абвешчана, што яго месца зойме расійская сетка фастфуда «Смачна — і кропка», адкрытая ў памяшканнях «МакДональдс» пасля яго закрыцця ў Расіі.

Меркавалася, што рэстараны пад брэндам «Смачна — і кропка» пачнуць працаваць у Беларусі 22 лістапада. Але 18 лістапада, каментуючы сыход амерыканскай сеткі фастфуда, Лукашэнка заявіў, што яго месца павінны заняць беларускія прадпрыемствы і вытворцы.

А раніцай 28 лістапада рэстараны пачалі працу без шыльдаў «МакДональдс» або «Смачна — і кропка». З тых часоў установы юрыдычный асобы «КСБ Віктары рэстараны» працавалі пад незразумелым брэндам «Мы адкрыты», аднак з новым меню, якое не ўсім прыйшлося даспадобы.

12 снежня Лукашэнка заявіў, што «МакДональдс» цяпер — «наша прадпрыемства». «Не захацелі амерыканцы ці хто там працаваць, то як хочаце, нашы людзі не дурнейшыя», — сказаў ён. Чыя канкрэтна цяпер гэта кампанія, палітык не ўдакладніў. Пры гэтым ён таксама казаў пра нацыяналізацыю кампаній, «гаспадары якіх сышлі».

Аднак уладальнікі сеткі, мяркуючы з адкрытых звестак, засталіся на момант гэтай заявы Лукашэнкі ранейшымі.

А 5 студзеня гэтага года стала вядома, што «МакДональдс» спыніў працу таксама і ў Казахстане праз абмежаванні ў пастаўках мяса для бургераў з Расіі.