Рыгору Кастусёву, які зараз у СІЗА, не змянілі меру ўтрымання. У палітыка падазрэнне на анказахворванне

Следчы адмовіўся змяніць меру ўтрымання для 64-гадовага лідара БНФ Рыгора Кастусёва. З СІЗА-1, яго вярнулі ў СІЗА КДБ. Пра гэта «Спутніку» паведаміла ягоная адвакатка Інэса Аленская, піша «Еўрарадыё».

64-гадовы Кастусёў з сярэдзіны красавіка знаходзіўся пад вартай у СІЗА №1 у Мінску. Там ён прайшоў медыцынскае абследаванне. Акрамя сардэчна-сасудзістага захворвання, у Кастусёва падазраюць і анкалогію.

Палітыка вінавацяць у змове з мэтай захопу ўлады. Яго затрымалі ў красавіку — адначасова з юрыстам Юрасём Зянковічам і літаратуразнаўцам Аляксандрам Фядутам. Усе гэтыя людзі — усяго толькі ўдзельнікі дыскусійнага клуба, дзе абмяркоўваліся далейшыя сцэнары развіцця падзеяў у Беларусі.