«Паглядзім, дадуць мне ў гэтай краіне памерці або не»

У Ленінскім судзе Гродна працягваецца судовы працэс над гродзенскім музыкам Ігарам Банцэрам, які дзясяты дзень трымае «сухую» галадоўку. Падрабязнасці распавядае «Свабода». 

Чарговае пасяджэнне па справе Ігара Банцэра, які дзясяты дзень трымае галадоўку ў СІЗА, пачалося ў судзе Ленінскага раёну Горадні 12 сакавіка.
«Я адчуваю сябе цудоўна на дзясятыя суткі сухой галадоўкі», — заўважыў Банцэр.
Яго не дазволілі здымаць у судзе, папрасілі схаваць тэлефоны. Банцэр у клетцы ў кайданках. Выглядае моцна схуднелым і бледным, аднак увесь час рухаецца, стаіць з паднятымі рукамі ў кайданках. Перад тым, як людзей пусцілі ў залю, адтуль былі чуваць неразборлівыя крыкі Банцэра.
Банцэр заявіў хадайніцтва, каб яго выпусцілі з-пад варты.
«Я сядзеў на "Валадарцы" з хворымі, забойцамі. Мяне часта блытаюць з імі. Я не такі, як яны. Я зорка рок-н-ролу. Я выправіўся і гатовы гэта даказаць», — адзначыў Банцэр у заяве.
Суддзя сышла, каб вырашыць хадайніцтва.
Справу разглядае суддзя Наталля Козел, дзяржаўны абвінаваўца — Віктар Нічыпарук, пацярпелы міліцыянт — Сяргей Багдзевіч.

«Я хачу „Краіну для смерці“ арганізаваць»

На першым пасяджэнні па сваёй справе 3 сакавіка Банцэр абвясціў «сухую» галадоўку. Ён не выстаўляў канкрэтных умоў, пры якіх пачне зноў піць і есці, аднак назваў дзве прычыны, якія яе выклікалі.
«У сувязі з відавочнай палітычнай афарбоўкай маёй крымінальнай справы, а таксама ў знак нязгоды з тым, што адбываецца ў палітычным плане ў Рэспубліцы Беларусь пасля 8 жніўня 2020 года, я абвяшчаю „сухую“ галадоўку. Гэта адзіны, паводле майго меркавання, легальны спосаб выразіць свой пратэст супраць тых негатыўных працэсаў, якія адбываюцца цяпер у краіне, грамадзянінам якой я з'яўляюся, дзе я пражыў 41 год, і пакідаць краіну я не маю намеру, нават пад пагрозай крымінальнага пераследу», — заявіў Банцэр у судзе.
Банцэр даваў паказанні ў судзе 4 сакавіка. Перад тым пасяджаннэм ён шмат гаварыў. На просьбу маці «Беражы энергію» сын адказаў так:
«Мама, быў адзін, які ашчаджаў энергію, „Краіна для жыцця“, сядзіць цяпер. Я хачу „Краіну для смерці“ арганізаваць. Паглядзім, дадуць мне ў гэтай краіне памерці або не на „сухой“ галадоўцы. „Краіна для жыцця“ не пракаціла, можа, „Краіна для смерці“ пракаціць, а, грамадзянін начальнік? Люблю вас усёй душой і іншымі часткамі цела, але пра гэта ўжо ўчора было».
Ён адзначыў, што яго ўчынак у ноч на 5 верасня быў арт-перформансам і часткай заходне-еўрапэйскага мастацтва.
«Мы спазняемся ў культурным плане на 50-70 гадоў (ад ЗША і Заходняй Еўропы). Мой арт-перформанс быў несвоечасовы. Трэба было 50 гадоў пачакаць. Але ў мяне няма гэтых 50 гадоў», — заўважыў Банцэр, параўноўваючы сябе з Эндзі Уорхалам.
Музыкант часткова прызнаў сябе вінаватым.
«Я быў, я танцаваў, усім спадабалася. На відэа ёсць людзі, якія кайфуюць. Я таксама кайфануў. Думаў, што і пацярпелы таксама кайфануў», — выказаўся Банцэр.
Ён перапрасіў пацярпелага міліцыянта, а таксама паасобку ўсіх прысутных у залі, называючы іх па імёнах. «З тым, што я сваім чэлесам падрываў аўтарытэт дзяржаўнай улады Рэспублікі Беларусь у 2020 годзе, я не магу пагадзіцца», — некалькі разоў дадаў фігурант.
Банцэр шмат разоў падкрэсліў, што ён падчас перформансу заставаўся ў стрынгах, таму не мог дэманстраваць палавыя органы. Адмыслова падчас танцу перакінуў паясную торбачку наперад і прыкрыўся і ёй таксама.
«У пацярпелага цудоўны зрок, і 10 з 10 ён выбівае на стрэльбішчы, як я зразумеў. За паўтары секунды ён убачыў у цемры мой чэлес, які быў прыкрыты барсеткай, што мае яркую аквамарынавую афарбоўку і блішчыць уначы... Барсетка знаходзілася на месцы, дзе мае быць мой чэлес. Таму фізічна заўважыць мой чэлес немагчыма», — патлумачыў Банцэр.

Што варта ведаць па справе

Ігара Банцэра судзяць за тое, што дэманстраваў палавыя органы перад міліцыянтам. Пазіцыя Банцэра: гэта быў перформанс з танцам, падчас якога ён зняў шорты, але заставаўся ў стрынгах, а спераду яго прыкрывала паясная торбачка. Пацярпелы міліцыянт не мае прэтэнзій да Банцэра, першапачаткова ён расцаніў яго ўчынак як п’яную выхадку, а не як крымінальнае злачынства.
Банцэру пагражае да трох гадоў калоніі. Ён знаходзіцца пад вартай з 20 кастрычніка мінулага года. Яму 41 год, жанаты, мае траіх непаўналетніх дзяцей.
Летась яго тройчы затрымлівалі за ўдзел у пратэставых акцыях, ён адседзеў у адміністрацыйных справах 18 сутак.
За 4,5 месяцы зняволення Банцэр амаль увесь час сядзеў у адзіночнай камеры і некалькі разоў у карцары, таксама яго высылалі на псіхіятрычную экспертызу ў Навінкі, якая паказала, што ён здаровы.