Не царскія, але харомы. Чым валодае «кашалёк» Лукашэнкі Павел Тапузідзіс

Цікавае гіпатэтычнае пытанне: ці атрымаліся б у сённяшніх беларускіх мільянераў іх бізнэс-імперыі без Лукашэнкі? Кім і дзе быў бы сёння адзін з самых буйных «кашалькоў» Лукашэнкі, уладальнік «Тытунь-Інвест» Павел Тапузідзіс?

Уладальнік тытунёвага бізнесу, сеткі рознічных крам і забаўляльных устаноў Павел Тапузідзіс лічыцца «кашальком» Аляксандра Лукашэнкі. Яго бізнэс-імперыя разраслася шмат у чым дзякуючы набліжанасці да палітыкі, хоць сам ён гэта адмаўляе. «Зеркало» з дапамогай каманды BELPOL паглядзела, якой маёмасцю валодаюць прадпрымальнік і яго сям'я. Звесткі прыведзены на сярэдзіну 2021 года.

Павел Тапузідзіс родам з грузінскай вёскі Апрэці. Яму цяпер 67 гадоў. «Наша Ніва» паведамляла, што ў юнацтве Павел перабраўся ў Беларусь, адвучыўся ў сталічным палітэху, працаваў у дзяржаўнай будаўнічай арганізацыі — займаўся ўзвядзеннем мастоў і даслужыўся да начальніка ўпраўлення.

«У 1980-я, калі мне было крыху за 20, мы з мужам яшчэ не былі багатымі і вельмі радасна жылі. Дзесяць гадоў пражылі ў Мінску на аўтазаводзе — у маленькім доме барачнага тыпу на чатыры сям'і. Там нарадзіліся дзеці. Жылі ад заробку да заробку. З пачкі тварагу пяклі гару смачнага печыва, дзяліліся з суседзямі рэцэптамі таннай салаты або баршчу. Калі нарадзіўся Паўлік, у нас не было нават падгузнікаў. Часам іх прывозілі з Польшчы, але апраналі толькі ў паліклініку», — апісвала ўмовы, у якіх жыў будучы алігарх, яго жонка Ірына Тапузідзіс (яна настаўніца).

Пасля распаду СССР Павел Тапузідзіс перайшоў у дробны бізнес — спачатку вырабляў пахавальныя вянкі, потым заняўся цацкамі. У 1990-х зарэгістраваў прадпрыемства «Прыма», а ў 1997-м — ТАА «Тытунь-Інвест», якое вырабляла цыгарэты ўласных марак. Адзначым, што «Тытунь-Інвест» уваходзіць у дзясятку самых буйных падаткаплацельшчыкаў Мінска.

У 2006 годзе Тапузідзіс заняўся развіццём рознічнага гандлю і пачаў запускаць гіпермаркеты «Карона». У 2011 годзе пачала працаваць яго забаўляльная ўстанова «Robinson Club» у пасёлку Ратамка каля сталіцы. У 2012 годзе «Тытунь-Інвест» адкрыў гандлёва-забаўляльны цэнтр «Замак» на праспекце Пераможцаў у Мінску.

Царскія харомы ў абмен на беларускую зямлю. BELPOL — пра рэзідэнцыю Лукашэнкі

Павел Тапузідзіс уваходзіць у акружэнне Аляксандра Лукашэнкі і лічыцца яго «прыдворным бізнэсменам». Пры гэтым прадпрымальнік адмаўляў, што яго бізнэс склаўся дзякуючы дзяржаве. Ён удзельнічае ў грамадскім і палітычным жыцці Беларусі, узначальваў адну з выбарчых камісій у Мінску ў 2015 годзе падчас прэзідэнцкіх выбараў. Тапузідзіс таксама з'яўляецца намеснікам старшыні Савета па развіцці прадпрымальніцтва пры беларускім урадзе і ганаровым консулам Грэцыі ў Беларусі.

Павел Тапузідзіс займае 18-е месца ў рэйтынгу бізнесменаў, які ў 2023 годзе склала выданне «Беларусы і рынак».

У снежні 2023 года супраць Паўла Тапузідзіса і яго кампаньёна Віктара Пятровіча ЗША ўвялі персанальныя санкцыі. У абгрунтаванні амерыканскага Мінфіна гаварылася, што гэтыя два бізнэсмены з'яўляюцца важнымі «кашалькамі» для Лукашэнкі і яго рэжыму.

Тапузідзіс жанаты на ўраджэнцы расійскага Бранска Ірыне, цяпер жанчыне 63 гады. У пары ёсць сын Павел і дачка Ксенія.

Некалькі дамоў і кватэр на чацвярых

Павел Тапузідзіс на сярэдзіну 2021 года меў нерухомасць у мікрараёне Дразды, гэта зямельны ўчастак і дом № 19 па вуліцы Рачной, аднак ён там не быў прапісаны. У Адзіным дзяржаўным рэестры дом быў зарэгістраваны ў 2006 годзе. А ў 2012-м праз дамову куплі-продажу яго запісалі на бізнэсмена.

Каменны катэдж Тапузідзіса займае два паверхі і склеп, таксама ёсць халодная прыбудова і гаспадарчы блок. Нерухомасць агульнай плошчай у 581,6 м2.

Участак пад домам займае плошчу 0,15 га, ён таксама перайшоў да Тапузідзіса па дамове дарэння ў 2012 годзе.

Таксама на бізнэсмене лічылася трохпакаёвая кватэра плошчай 64 «квадраты», прадпрымальнік быў прапісаны па гэтым адрасе. Жыллё размешчана ў цагляным дзевяціпавярховіку № 14 на вуліцы Берута. Дом быў пабудаваны ў 2000 годзе, ён знаходзіцца прыкладна ў 15 хвілінах хады ад станцыі метро «Пушкінская». Кватэра набывалася па дамове долевага будаўніцтва, якая была заключаны ў 1999 годзе.

Жонка бізнэсмена Ірына валодае нерухомасцю ў вёсцы Вялікае Сціклева ў Мінскім раёне, гэта катэдж № 17 на вуліцы Садовай. Да МКАД з боку вуліцы Байкальскай на аўто можна даехаць за пяць хвілін.

Тапузідзіс забудоўвае Мінскае мора

Дом цагляны, з двух паверхаў. У ім ёсць ацепленая прыбудова, цокальны паверх, мансарда і тэраса. Плошча нерухомасці — 473,9 м2. Жыллё было зарэгістравана на Ірыну ў 1996 годзе. Пры гэтым падставай для рэгістрацыі быў «іншы дакумент», а менавіта — рашэнне Навадворскага сельсавета. Іншыя падрабязнасці па гэтай працэдуры невядомыя.

Таксама за жанчынай лічыцца трохпакаёвая кватэра ў доме № 1б на вуліцы Альшэўскага ў Мінску. Гэта ў пешай даступнасці ад станцыі метро «Пушкінская» і недалёка ад кватэры на вуліцы Берута, якая належыць Паўлу Тапузідзісу. Гэты дом быў пабудаваны ў 2007 годзе.

Метраж жылля — 76,2 м2. Маёмасць набыта ў 2013 годзе па дамове куплі-продажу.

Цяпер у доме № 1б на вуліцы Альшэўскага ў Мінску прадаецца двухпакаёвая кватэра з рамонтам, яе кошт — 317 562 рублёў, або 99 000 долараў. Адзначым, што гэта верхняя цэнавая мяжа па жыллі ў гэтым раёне.

Павел, сын мужа і жонкі Тапузідзісаў, быў прапісаны ў доме 20 на вуліцы Усходняй у вёсцы Вялікае Сціклева. Гэта ў 10 хвілінах ходу ад дома, які належыць яго маці.

Дачка Тапузідзісаў, Ксенія, якой цяпер 41 год, валодала двума аб'ектамі нерухомасці, размешчанымі недалёка ад Мінска. Адзін знаходзіцца ў аграгарадку Ждановічы на вуліцы Каштанавай, 6. Гэта двухпавярховы блочны дом з двума навесамі і тэрасай, ён займае плошчу 325,6 м2. Нерухомасць зарэгістравалі ў Адзіным дзяржрэестры ў 2008 годзе, а ў 2016-м Ксенія набыла яго па дамове куплі-продажу.

Участак пад домам займае 0,135 га, раней ён быў у арэндзе, але ў 2016-м, неўзабаве пасля куплі дома, яго перавялі ў катэгорыю пажыццёва спадчыннага.

Яшчэ адзін блочны дом, які лічыцца за Ксеніяй, размешчаны ў 19 км ад Мінска, яго адрас: вёска Павялкова (Дзяржынскі раён), вуліца Цэнтральная, 33. Ён быў пабудаваны і набыты ў 2010 годзе.

Аб'ект мае плошчу амаль 271 «квадрат», ён з бетонным падвалам, мансардным паверхам, гаражом. Таксама маецца драўляная лазня з дашчанай прыбудовай і навесам.

Участак каля дома займае плошчу 0,25 га.

А што па аўто?

На старэйшым Паўле Тапузідзісе лічылася пяць аўтамабіляў:

ВАЗ-21011 1979 года выпуску;

ЗАЗ 965, або «гарбаты запарожац», 1968 года выпуску;

Lada 21 214 «Ніва» 2021 года выпуску;

Mercedes-Benz 230 1989 года выпуску;

BMW 750 2013 года выпуску.

Санкцыі? Да вы што! Рэжым працягвае гандляваць з Брытаніяй на мільёны долараў

Бізнесмен шэсць разоў прыцягваўся да адміністрацыйнай адказнасці па лініі ДАІ.

У жонкі Тапузідзіса Ірыны быў «Land Rover Evoque» 2012 года выпуску і «Mercedes-Benz S500» 2015 года. Мадэлі з такім годам выпуску і цяпер можна купіць у Беларусі. Напрыклад, першае аўто каштуе ў сярэднім 58 701 рубель (18 300 долараў).

У малодшага Паўла Тапузідзіса быў выпушчаны ў 2015 годзе недарожнік «Mercedes-Benz G350».

Ксенія Тапузідзіс валодала «BMW X4» 2020 года выпуску. Цяпер такая мадэль, выпушчаная чатыры гады таму, каштуе ад 149 158 рублёў (46 500 долараў) да 190 858 рублёў (59 500 долараў).

Ёсць і ўласны арсенал

Мабыць, Павел Тапузідзіс захапляецца паляваннем, у яго арсенале ёсць паляўнічы карабін «Сайга-410» і стрэльба ТОЗ-34. Таксама ёсць пісталет Марголіна (ён выкарыстоўваецца для спартыўнай стральбы) і нямецкі спартыўна-трэніровачны пісталет «Walther P22».