"Начныя ваўкі" зноў прыедуць у Беларусь

Расійскія байкеры з клуба "Начныя ваўкі" зноў прыедуць у Беларусь — для ўдзелу ў мотапрабегу "Дарогі Перамогі. На Севастопаль". 



Як паведамляе сайт клуба, прабег стартуе 10 жніўня з пяці гарадоў (Брэста, Санкт-Пецярбурга, Казані, Масквы і Алматы) і закончыцца ў Севастопалі, дзе 21 жніўня адбудзецца ХХ Міжнароднае байк-шоу "Севастопаль. Кузня Перамогі".
Як расказаў прэзідэнт аддзялення "Дарогі Перамогі" мотаклуба "Начныя ваўкі" Андрэй Баброўскі, удзельнікі еўрапейскай часткі пачнуць збірацца з 10.00 10 жніўня ў Брэсце, каля пагранперахода "Цярэспаль", там будзе праходзіць рэгістрацыя. Раніцай 11 жніўня яны паедуць цераз Беларусь у Арол, а затым у Растоў-на-Доне, дзе збяруцца разам пяць калон. 
"Адтуль рушым на Севастопаль. Нашым еўрапейскім сябрам, якія захочуць далучыцца да нашага мотапрабегу "Дарогі Перамогі", мы прапануем праехаць да Паўночнага Каўказа, наведаць Чачню, Інгушэцію, Кабардзіна-Балкарыю. У пасёлку Цярскол — гэта Кабардзіна-Балкарыя, Прыэльбруссе — удзельнікі прабегу перасядуць з матацыклаў на фунікулёры і падымуцца на Эльбрус, дзе будуць усталяваныя сцягі "Начных ваўкоў", "Рускіх матацыклістаў" і краін — удзельніц прабегу", — сказаў Баброўскі.
У Крым калона адправіцца цераз Краснадарскі край. "Гэта другая частка мотапрабегу для тых еўрапейцаў, хто захоча даехаць да Севастопаля", — зазначыў прадстаўнік клуба. 
Нагадаем, у Брэсце сёлета няўдала завяршыўся іншы мотапрабег маскоўскага мотаклуба — "Дарогі Перамогі", у межах якога "Начныя ваўкі" планавалі з 25 красавіка па 9 мая праехаць з Масквы ў Берлін цераз Мінск, Брэст, Вроцлаў, Брно, Браціславу, Вену, Прагу, Мюнхен і іншыя еўрапейскія гарады.
Планы расійскіх байкераў выклікалі негатыўную рэакцыю ў краінах, якія яны мелі намер наведаць, МЗС Польшчы адмовіла групе расійскіх матацыклістаў ва ўездзе. 27 красавіка "Начных ваўкоў" не пусцілі на тэрыторыю Польшчы, а кіраўніку групы Андрэю Баброўскаму анулявалі візу. 28 красавіка праект "Дарогі Перамогі. На Берлін" быў фактычна згорнуты.
Паводле БелаПАН